Verê cû gama ke ma tût bî, biney kokimanê ma vatêne ke dinya ver bi xirabîye şina û çi  xêyr tede nêmendo. Raşta ci o çax vateyê înan ma rê bê mana ameyêne, ma vatêne qe î kokim bîyê aye semed ra o tewir fikirîyenê. La ewro ma ewnîyenê ke tenya kokimanê ma nê zafaneyê ciwananê ma zî fek her çîyê ra verda û hêvîya xo na dinya ra birnayê.

Dewro ke ma nika tede ciwîyenê dewrêko xedar û bixof o, her roc ma benê şahidê ecêb û gosirmetanê neweyan. Nê dewrî de qîmetê ganê merdimî nêmendo, merg bîyo çîyêko asan. Ma menfaetê xo û malê dinya her çîyê ser o ginê, karê ke tede zerar est o ma xo nêdano ver. Seke verê cû mîyanê komelê ma de ne embiryanîye menda, ne birayîye menda, ne embazîye menda û ne zî dostîye, cayê ke faydê ma tede çinê bî ma nêşinî weyra. Reyna zerreyê merdiman de rehm nêmendo, şarî bi çimê duşmenî ewnîyenê yewbînan, tersa Homayî zerreyê merdiman de nêmenda, yê tewr avzêl zî bawerîya şarî bi yewbînan nêmenda. Êdî bira bi birayî, pî bi lajê xo, maye bi kêyna xo, cênî bi merdeyê xo bawer nêkena. Komelê ma exlaqî ra zaf dûr kewto ke roca ma ya ewroyêne de eke cayêko aşkera de çîyêk bêro sereyê yewî merdim terseno ke hetê ci bikero, çimkî zaf reyî sereyê merdimê ke şino hetkarîye keno belayê. Çîyê ke ma verê cû telewîzyonan de dîyêne nika dormeyê ma de qewimîyenê, ma zaf reyî bîyê şahid ke tûtî may û piyê xo erzenê, maye tûtê xo erzena, xora zewac û yewbînî veradayene bîyo kayê domanan.

Verê cû şarî zerrî ra yewbînan persayêne, la nika ma yew wezîfeyê xo zî zerrî ra nêkenê, ma her çîyê xo seba ferq û payeyê kenê. Nika gama ke ma şinê nêweşan ser o zî, gama ke ma şinê ezayîyan zî, gama ke ma şinê veyveyan zî, gama ke ma karê yewî vînenê zî nîyet û armancê ma tenya quretî yo. Xora merdimê ke feqîr bî, ne roşanan de yeno ma vîre û ne zî nêweşî de ma persê ci kenê, bi kilmekî ma roce bi rocê merdimîye ra dûr şinê. Na raştîya (dûrşîyayişê merdimîye ra) komelê ma çîyêko nimitkî nîyo, aşkera yo, çimkî şar bi xo zî hertim û heme qadanê cuye de qala nê dehkereyê keno û nêrazîbîyayişê xo mojneno.

Însanetîye ra dûrkewtene

Bêguman di xozaya her merdimî de başîye û xerabîye est a, coka tarîx ra nata çi rey şer û pirodayîş dinya de kem nêbîyo. Verê cû zî merdiman seba hard û hêgayan yewbînan kiştene la o çax zerreyê merdiman de biney rehm estî bî. Roca ma ya ewroyêne de şertê cuye goreyê verê cû zaf asanêr ê. Dewrê ke nika ma tede ciwîyenê dewrê zanist û teknolojîyî yê. Bi averşîyayîşê teknolojîyî ra komelê ma roc bi rocê cûya aîleyî ra dûr keweno. Helbet zaf persê binî yê seke şer, ceng, feqîrîye, bêkarîye û madeyo hişbirî zî bîyê semedê xerabîya komelî, la tewr zaf tesîrê teknolojîyê heme komanê komelî ser o est ê. Coka ra her çendê cuya merdiman asan kerdibî zî raştîya xo de semedê tewr pîl yê xerabbîyayîşê exlaqê komelî teknolojîyî yo.

Merdimîye û nefs

Roca ma ya ewroyêne de malê dinya çimê merdiman kor kerdo, coka ra xerabbîyayîşê komelî xemê kesî de zî nîyo, her kes vano wa çîyêk bi mi nêbo û malê mi zaf bibo kom ça ra de mireno wa bimiro. Raşta ci eke ma wazenî komelê xo na nêweşiya ra bixelesnê, ganî ma bi xo de dest pêbikerê. Ganî ma vernî de kêmaneyê xo bizanê û nefsê xo kontrol bikerê. Eke ma bi yê nefsê xo bikerî û xo şarî ra pîl bivînê o çax ma nêeşkenê komeleyê xo rê bibê ferdêko baş, çimkî çîyo ke merdimî beno helakê nefs o. Aye semed ra zî seba ke havilê ma biresê komelî û seba ke ma xo baş nas bikerê ganî baş û raşt biwanê û xo perwerde bikerê. Reyna ganî ma hertim seba xeyrê merdimîye çîyê başî bikerê û hertim hurmet bidê heq û huqûqê her kesî, çimkî eke merdimî xo bizanê şar zî do înan bizano. Eke destê ma de nîyê ke ma seba komelê xo çîyê başî bikerê, o çax ganî ma paştî bidê ê kesanê ke seba komelî çîyê başî kenê.

Helbet tu kes bi tenya xo nêeşkeno komelî bibedilno la merdim eşkeno bi kerdeyanê xo yanê pankan, bi exlaqê xo yê başî, bi vateyanê xo yanê raştan û bi ziwanê xo yê nermî merdiman rê bibo nimûneyêko baş.