MED-DER o ke rîyê erdlerzî ra xebatanê ziwan û kulturî rê mabên dabî, do ders û atolyeyan reyna dest pêbikero.
Hemsereka MED-DERî Şukran Yakute û Mamosteyê Kurdkî û Endamê MED-DERî Mehmet Olmezî da zanayene ke, 21ê Sibate Roja Ziwanê Dayîke ya Cîhanî de xebatê kultur û ziwanê kurdkî êdî do sey verê dewam bikerê.
Şukran Yakute mexdûranê erdlerzî rê şîfa û serweşîye waşte û Roja Ziwanê Dayîke ya Cihanî kurdan rê pîroz kerde. Aye dîyar kerd ke ewro ra tepîya xebatê înan dewam bikerê û vera talûkeyê vindîbîyayîşê ziwanî bi heme hêzê xo têkoşîn bikerê.
Mamoste Mehmet Olmezî ard ziwan ke Amed de cuye hêdî-hêdî normal bena û vat, ‘‘Gere xebatê ziwanî bêmabên her roje dewam bikerê, çi heyf ke rîyê nê erdlerzî ra hem ma zirarêko gird dî hem zî ma xebatanê ziwanî ra dûrî kewtî. Roja Ziwanê Dayîke de ma wazenê eşkera bikerê ke perwerdeyê ma yê sinifan do sey verê dewam bikerê û qeydê neweyî zî do reyna bêrê girewtene.
Olmezî ard vîrardene ke, verê erdlerzî hem onlîne hem zî rî bi rî perwerdeyê ziwanî ameyêne dayene û vat, ‘‘Asta destpêke, asta yewine û asta diyine de hem onlîne hem zî rî bi rî sinifê ma estê. Xeylê kursîyerê ma û xeylê mamosteyê ma beşdarê xebatan benê. Tena perwerdeyê qiseykerdişî ney, yê wendişî û yê açarnayîşî zî yenê dayene. Ma nê erdlerzî ra dima no hewte, nê xebatanê xo pêro reyna danê destpêkerdene. Ziwananê kurdkî mîyan ra tewr zaf lehçeya ma kirmanckî talûke de ya. Bi serran o ke mamosteyê ma vera ney xebitîyayî û nika ra dima zî ma do xebata xo xurtêr bikerê û rayîrê mamosteyanê xo ra dewam bikerê’.’
