Meclîsê Şarî yê Şêxmeqsûd û Eşrefîye vera vengdayîşanê teslîmbîyayîşî yê çeteyanê girêdayeyê Hukmatê Demkî qerar da ke taxanê xo de bimanê û bipawê.

Meclîsê Şarî yê Şêxmeqsûd û Eşrefîye vera vengdayîşanê teslîmbîyayîşî yê çeteyanê girêdayeyê Hukmatê Demkî qerar da ke taxanê xo de bimanê û bipawê û nê qerarê xo zî bi eşkerayêke dîyar kerd.

Eşkerayîye de ame vatene: “6ê çeleyî ra nat taxê ma binê hêrişê çekanê giranan û bombardumanî de yê. Nê hêrişan de camîyan, mekteban, keyeyanê sîvîlan û sazgehanê xizmetan kenê hedef. Nê hêrişî hedef kenê ke vera şarê ma yê ke bi seyan serrî yo nê taxan de ciwîyeno, qirkerdişêko newe dest pêbikero û demografî bêro vurîyayene.”

Eşkerayîye de bêvengîya hêzê mîyannetewîyan ke peymananê 10ê adare û 1ê nisane de sey garantor û çimdarêk ca girewt bi şîdet ame şermizarkerdene.

Krîzêko cîddî yê însanîye

Eşkerayîye de ame vatene ke nê taxan de bi se hezaran sîvîlî ciwîyenê, netîceya bombardumanî de bi desan hemwelatî birîndar bîyî ke zafê înan cinî û qij ê. Nêweşxaneyê Xalîd Fecîr binê bombardumanê giranî de mend û nika temamen teberê xizmetî de yo.

Qerarê xoverdayîşî

Meclîsî vat: “Vengdayîşo ke Hukmatê Demkî yê Şamî şarê ma û hêzanê ma yê asayîşî rê kerd, teslîmbîyayîş o, labelê şarê ma bi qerardarîye wazeno taxanê xo de bimano û taxanê xo bipawo. Seba kerdişanê hukmatê Şamî û qirkerdişanê ke rojanê peyênan de şarê ma ser o kerdî, ma bawer nêkenê ke eşkenê emnîyetê şarê ma bikerê. Ma qerar da ke taxanê xo de bimanê û taxanê xo bipawê.

Peynî de, ma venga şarê xo yê Şêxmeqsûd û Eşrefîye danê ke şêrê Nêweşxaneyê Xalîd Fecîrî birîndaranê xo rê wayîr bivejîyê û seba pawitişê taxanê xo seferber bibê.”