Meclîsê Cinîyan ê HDPyî derheqê Dewaya Kobanê ya ke pê hukmê ke kontrolê îqtîdarî de yo yena rayraberdene de vat: ”Ma do mebê êyê ke yenê muhakemekerdene, ma do bibê êyê ke muhakeme kenê.”
Meclîsê Cinîyan ê Partîya Demokratîke ya (HDP) derheqê Dewaya Kobanê de eşkerayîya nuştekîye daye.
Cinîyan vat: ”Vera têkoşînê cinîyan û destkewteyanê ma her roje yewna hêriş yeno kerdene. Aktîvîstê cinî, sîyasetmedarî bîlasebeb, bêhuqûq yenê destbendkerdene û tepiştene. Nîmuneyo peyên ê nayî protestoyê vera îşxalê Kobanê yê 6-8ê teşrîna verêne sey bahane ameyî mojnayene û vera HDPyîjan dewa ameye akerdene.”
Eşkerayîye de nê ameyî vatene:
”Na dewaya ke bi kayanê sîyasîyan ameye akerdene de 14ê înan tepişteyî 17 embazê ma yê cinîyî yenê muhakemekerdene. Ma do pîya bi nînan mebê êyê ke yenê muhakemekerdene, ma do bibê êyê ke muhakeme kenê. Êyê ke cinîyan ê xoverdayoxanî ê ke têkoşînê demokrasî û azadîye danê eştê zîndanan, ma do înan muhakeme bikerê! Êyê ke hemserekîye û teslîmîyetê seciyeyî sey sucî vînenê, ma do înan muhakeme bikerê! Êyê ke wazenê Pêkerdişê Stenbolî betal bikerê, ma do înan muhakeme bikerê! Êyê ke têkoşînê ekolojî sey sûcî vînenî û xoza talan kenê, ma do înan muhakeme bikerê! Êyê ke cinîyan ê ke têkoşînê cinîyan rayra benê rehîn genê, ma do înan muhakeme bikerê!
Ma do bibê vengê cinîyan ê ke DAIŞî qetil kerdî û înanê ke nê çeteyê serbest vera dayî, ma do înan muhakeme bikerê! Cinîyê ke vanê têkoşînê cinîyan nêno muhakemekerdene, ma venga înan danê ke wa paştdayîşî pîlêr bikerê!” ANQARA
