Verfekê Çapemenîye yê Hêzanê Surîyeya Demokratîke (QSD) Ferhad Şamî, Televîzyonê Al Arabiya rê ke merkezê ci Erebîstanê Seudî de yo qisey kerd. Şamî, çerçewaya Mutabaqatê 10ê Adare de derheqê pêvînayîşanê ke mabênê Îdareyê Xosere yê Sûrîyeya Vakûr û Rojhelatî û hukumetê demkî yê Sûrîye de dewam kenê de ercnayîşî kerdî.
Ferhad Şamî da zanayene ke Fermandaro Pêroyî yê QSD’yî Mazlum Ebdî do verê peynîya serre şiro Şam û va ke ê tewrbiyayîşê QSD’yî yê Artêşa Sûrîye ser o hemfikir ê û Şamî reyde xalê muşterekî estê.
Şamî, îdîayê ke tayê organanê weşanî de weşaniyayê û vanê QSD’yî eyaletê Siweyda de hêzê leşkerî yê durziyan perwerde kerdê, bi ziwanêko qetî zûra vetî. Şamî vat, “Ma hêzê Hîkmet El Hîcrî perwerde nêkerdî. Têkilîya ma ya bi şarê durzîyan hem sîyasî ya hem zî hetê şarî ra ya; tecrubeyê înan ê leşkerî estê û hewce nêkenê ke Hêzanê Sûrîyeya Demokratîke ra perwerdeyê leşkerî bigêrê.”
‘Têkilîya ma bi Îsraîlî reyde çina a’
Şamî, îdîayê derheqê têkîliyanê QSD û Îsraîlî zî zûra vetî û va, “Têkilîya ma bi Îsraîlî reyde qet çin a. Eke têkilîyî bi Îsraîlî reyde bibiyêne, kesî cesaret nêkerdêne ke êrişê QSD’yî bikero. Kesê ke nê vatişan vila kenê, ê kes ê ke projeyê neteweyî yê Sûrîyeyo hîra ra bêpar ê.
Ebdî: Hukmato Demkî reyde diyalog nêbirîya
Nê mabên de Fermandaro Pêroyî yê QSD’yî Mazlum Ebdî, ewro qiseykerdişê xo yê kombîyayîşê Heyetê Şêwirmendîye yê Paştîdayîşê Komîteya Muzakereyê Sûrîyeya Vakûr û Rojhelatî de ke şaristanê Tebqa yê Îdareyê Xoser ê Sûrîyeya Vakûr û Rojhelatî de viraziya, eşkerayîya wînayênî dayî.
Ebdî, besteyîya xo ya bi Mutabaqatê 10ê Adare reyna tesdîq kerde û îfade kerd ke dem bi dem îxlalî bibê zî, hukmato demkî reyde dîyalogê raşteraşt û nêraşterastî nêbiriyayê û semedê averşiyayîşî tim xeyret beno.
