Mayê/Merdimê Şemeyî semedê persayîşê aqibetê merdimanê xo yê ke bi destê dewlete ameyî vîndîkerdene û semedê muhakemekerdişê kiştoxan hewteyê hezarinî yê çalakîya xo de Meydanê Galatasarayî de ameyî têhet.

Partîyanê sîyasîyan û hêzanê demokrasî zî paştî daye çalakîye. Hemvervatoxê HDKyî Esengul Demîre û Cengîz Çîçek û Hemserekê Pêroyî yê DEM Partî Tulay Hatîmogullari û Tuncer Bakirhan zî tewrê çalakîya nê hewteyî bîyî.

Metnê çapemenîye de nê ameyî vatene: “Ma hezar hewte yo ke tîya yenê têhet û wazenê ke aqibetê merdimanê xo yê ke hetê dewlete ra ameyî destbendkerdene û dima ra ameyî vîndîkerdene bizanê. Kesê ke ameyî vîndîkerdene ma ne dîyî ne zî cenazayê ci est ê. Înan ra têna ma rê fotografî mendê ke ma çalakîye de kirişenê. Ê zî sey şima bîyî, tewr sînayeyê ma bîyî. Hezar hewte yo ke dejê ma kêm nêbeno û ma bi hêvî pawenê. Hezar hewte yo ma aqibetê merdimanê xo persenê. Merdimê ma yê vîndîkerdeyî hey ça de yê, kiştoxê înan qey nînê cezakerdene. Ma xo vîr ra nêkenê, ma do çirey înan xo vîr ra mekerê. Hezar hewte yo ma qîrenê, ma do çirey waştişê xo ra peyser game meerzê.”