Çalakiya Nobeta Edaletê ya Malbata Şenyaşar di 9’ê adara 2021’an de li ber deriyê Edliyeya Rihayê daye destpêkirin di roja 821’an de didome. Emîne Şenyaşar a ji mala xwe ya li navçeya Pirsûsê hate ber deriyê Edliyeya Rihayê li qada weke “Quncikê edaletê yê Malbata Şenyaşar” tê binavkirin dest bi nobeta xwe kir. Şenyaşar a pankarta “Ji bo Malbata Şenyaşar edalet” bi bariyerên beton ve kir, têkildarî têkoşîna xwe ya edaletê ku didomîne û komkujiyê welatiyên ku rêya wan dikeve edliyeyê agahdar kir.

Her wiha li ser hesaba medyaya dîjîtal a malbatê hesabên Wezareta Dadê û Wezîrê Dadê Yilmaz Tûnç hatin etîketkirin û ev peyam hate parvekirin: “Hinek din sebir. Hinek din têkoşîn. Li qesra pişt pankarta edaletê, edalet hatiye mehkûmkirin. Wezîrê Edaletê hate guhertin, bêedaletî didome. Di roja 821’an de ye.”