Xizm û parastvanên Parlamenterê AKP’ê yê Rihayê Îbrahîm Halîl Yildiz di 14’ê hezîrana 2018’an de li navçeya Pirsûs a Rihayê êrişî Malbata Şenyaşar kiribûn. Di encama êrişê de hevjînê Emîne Şenyaşar û du kurên wê hatibûn kuştin. Li ser vê yekê Emîne Şenyaşar û kurê wê Ferît Şenyaşar di 9’ê adara 2021’an de li pêşiya Edliyeya Rihayê dest bi çalakiya Nobeta Edaletê kiribûn. Çalakiya Malbata Şenyaşar di roja 749’an de berdewam dike.

Emîne Şenyaşar û kurê xwe Ferît Şenyaşar ku ji bo hevdîtina bi Fadil Şenyaşar çûn Xarpêtê, nobeta xwe ya edaletê îro li ber Girtîgeha Xarpêtê girtin. Ferît Şenyaşar ê li ber girtîgehê axivî û diyar kir ku sedema wan a li ber Girtîgeha Xarpêtê girtina birayê wî ya bi hêza siyasî ya parlamenterê AKP’î ye û ev tişt got: “Birayê me nêzî 5 sal in bi awayekî bêhiqûqî di girtîgehê de tê ragirtin. Dê di 16’ê gulanê de ji doza nexweşxaneyê û kargehê ya kirin yek bê darizandin. Di 14’ê Gulanê de wê edalet pêk were û em ê birayê xwe ji vir bigirin û bibin mala wî.”

Ferît Şenyaşar, bal kişand ser namzetiya xwe ya parlamenteriyê ya ji Partiya Çepên Kesk a ji rêza 4’emîn a Rihayê û anî ziman ku wê têkoşîna xwe ya edaletê di 14’ê Gulanê de veguhêzin Meclisê û ev tişt anî ziman: “Em ê ji Girtîgeha Xarpêtê heta Edîrneyê bibin dengê hemû girtiyên siyasî û KHK’iyan ê li Meclisê.”