Çalakiya “Nobeta Edaletê” ya Malbata Şenyaşar a li pêş Edliyeya Rihayê ket roja 36’an. Malbata Şenyaşar dê li pêş edliyeyê fitara xwe veke.
Ferît Şenyaşar bi bîr xist ew bi êrîşan re rûbirû dimînin û wiha got: “Heke darizandineke adil hebûya wê birayê min hatibûya berdan. Cezayekî giran dan birayê min û di odeyeke yek kesî de tê girtin. Em nikarin biçin malê. Em ê di meha Remezanê de li vir bin. Em ê li vir fitara xwe vekin. Em naçin. Heta ku ew 23 kesên dozger qala wan kir neyên girtin em ji vir ranabin.”
Şenyaşar diyar kir ku xizmên Yildiz ê AKP’î ku li nexweşxaneyê êrişî wan kirin di Şaredariya Pirsûsê û saziyên din ên fermî de dixebitin û wiha got: “Kesên ku me teşhîs kirine niha li saziyên cemaweriyê de dixebitin. Birayê min kes nekuşt. Raporên pispor jî vê aşkera dike.” Şenyaşar carek din banga piştevaniyê kir.
Beriya hilbijartinên 24’ê hezîrana 2018’an de parêzvan û xizmên malbata parlamentere AKP’ê Îbrahîm Halîl Yildiz li Pirsûsê êrîşî malbata Şenyaşar kirin û di encamê de Haci Eshed Şenşayar, Adil Şenyaşar û Celal Şenyaşar hatibûn kuştin.
RIHA
