Malbata Şenyaşar çalakiya xwe ya nobeta ‘Edalet’ê di roja 60’î de didomîne.
Ji ber qedexeya derketina derve ya ji ber nexweşiya pandemiyê, Emîne Şenyaşar û kurê xwe Ferît Şenyaşar nobeta xwe ‘Edalet’ê ya ji bo pêkhatina edaletê, li mala xwe ya Pirsûsê didomîne.
Malbatê li ser hesabên xwe yê medyaya civakî, bi wêneyên Haci Esvet Şenyaşar û kurên wî Adil û Celal Şenyaşar ên hatin qetilkirin, wiha nivîsî: “Bavek ji bo zarokên xwe bibîne, diçe nexweşxaneyê. Ew bav tevî zarokên xwe, li nexweşxaneyê bi lînçkirinê tê kuştin. Di ser bûyerê re 3 sal derbas dibin. Hê jî lêpirsîn tune ye. Belkî neyê bawerkirin lê ev rastiyek e. Made 2: Komara Tirkiyeyê Dewleta Hiqûqî ye!”
Çi bûbû?
Li navçeya Pirsûsê ya Rihayê beriya hilbijartina giştî ya 24’ê hezîrana 2018’an, alîgir û parêzvanên parlamenterê AKP’ê yê Rihayê Îhbrahîm Halîl Yildiz êrîşî malbata Şenyaşar kiribû û Haci Esvet û kurên wî Adil û Celal kuştibûn. 2’yê nîsanê Dadgeha Cezayê Giran a 3’yemîn a Meletiyê li Fadil Şenyaşarê girtî 37 sal û 9 meh û li Enver Yildiz jî 18 sal ceza birî. Malbata Şenyaşar bi daxwaza pêkhatina ‘Edalet’ê 51 roj in li ber edliyeya Rihayê û di dema qedexeyên derketina derve de li malê nobeta ‘Edalet’ê didomîne.
RIHA
