Vera Rayberê PKKyî Abdullah Ocalanî 9ê teşrîna verêna 1998î de komployê mîyanneteweyî dîya dest pêkerdiş û 15ê sibata 1999î de teslîmê Tirkîya ame kerdiş. A roje ra nata Ocalan binê tecrîdî de yo û 35 aşmî yo tu xeberêke ci ra nîna girewtiş. Seba peynîardişê tecrîdî û azadîya Ocalanî 10ê teşrîna verêna 2023yî de 74 merkezanê dinya de bi sloganê “Abdullah Ocalanî rê azadî, problemê kurdî rê çareserîya sîyasî” kampanya dîyaye destpêkerdiş. 27ê teşrîna peyêna 2023yî de zî zîndananê Kurdistan û Tirkîya de Grevê Vêşanîye bi eynî taleban dîya destpêkerdiş û bajarê sey Wan, Amed, Mêrdîn, Êlih, Mêrsîn, Edene, Stenbol û Îzmîr de merdimanê tepişteyan çalakîya “Nobeta Edaletî” daye destpêkerdiş.

Derheqê babete de Helîme Topuze ya ke dadîya tepişteyê bi nameyê Îhsan Topuzî ke Zîndanê Çankaya de tepişte yo, qisey kerd.

Dişmenîya vera kurdan

Topuze qiseykerdişê xo de bale ante serê armancê Nobeta Edaletî û tecrîdê serê heme tepişteyanê azadîye û wina vat: “Armancê ma dadîyan tena edalet, aştî û azadî yo. Ma vanê wa xo bikerî herinda ma. Netîceya nê tecrîdî de hezar çîyî qewimîyayî û ameyî sereyê merdiman. Seke ma vînenê çîyê ke kenî seba menfaetanê xo pê anî. Do tecrîdî reyde dişmenîya vera kurdan heta key dewam bikera? Sebebê tecrîdo ke serê birêz Ocalan û heme tepişteyanê zîndanan de yeno rayîraberdiş, tena dişmenîya vera kurdan o. Ma zî sey dadîyanê tepişteyan heta ke serek û domanê ma nêresî azadîya xo do çalakîya xo rê dewam bikerî. Di aşmî yo ke ma Nobeta Edaletî de yî. La çi heyf o dewlete de edalet çinî yo. Eke dewlete edalet çî yo bizanayêne, do tu rey tecrîdêko winasî nêbîyêne û berê Girawa Îmraliyî bidayêne akerdiş.”

Sîstemo ker, kor û lal

Topuze dewamê qiseykerdişê xo de qala Rayraşîyayîşê Azadîye zî kerd û vat: “Heme parlementeranê ma dest pê çalakîya ‘Rayraşîyayîşê Azadîye’ kerd. Xeylê bajaran de keye û merdimanê tepişteyan zî dest pê çalakîya ‘Nobeta Edaletî’ kerd. Her ca de sîstemî xo ker, kor û lal kerdo, seke qet çalakîyan nêvîneno. Do nê çalakîyî heta key dewam bikerî? Ma do vera înan caardişan de her tim vinderî. Domananê ma hîrê aşmî yo ke dest pê çalakîya Grevê Vêşanîye kerd. Wexto ke ma şinê keyeyê xo, ma hetê wijdanî ra rehet nîyî. Tîya ra zî asîyeno ke armancê sîstemê tirkan kaos o û têkoşînê Kurdistanî bido peynîkerdiş. Tena derdê înan dişmenîya kurdan o.”

Tecrîdê zîndanan

Topuze ard ziwan ke heme kesê ke vanê ma serkêşîye kenê wa seba wedaritişê tecrîdê Îmraliyî û heme zîndanan çi destê înan ra yeno, bikerî. Topuze wina vat: “Eke wina nêşêro sere do heta key wina dewam bikero? Do tecrîdê serê zîndanan bêro wedaritiş. Senî ke ma înan xo rê muxatab vînenê, ganî ê zî ma xo rê muxatab bivînî. Ma zî însan î, ganî destê ma bêro tepiştiş û problemê kurdan bêro çareserkerdiş. Ganî bi serekê ma pêvînayîş bêro kerdiş.”

Topuze dîyar kerd ke xebatê ke embazê înan seba Rayraşîyayîşê Azadîye û çalakîya Grevê Vêşanîye kenî zaf pîroz î û wina dewam kerd: “Semedo ke bawerîya înan bi dewaya înan û bi Homayî est a do qet paştîya înan nêreso erd. Ma vanê wa ê zî destê xo ronî serê wijdanê xo û bi edalet têbigêrî. Wexto ke ma bi domananê xo reyde qisey kenê, vanê çîyêk ke vera tepişteyan de ameyo bedilnayîş çinî yo. Venga domananê ma zî heme keyeyan rê est a. Vanê ke wa wayîrê çalakîya xo bivejî. Kurdistan, Tirkîya û welatê Ewropa de vera nê tecrîdî xebatê zaf muhîmî û pîrozî qewimîyenê.”

Ma do her çî bikerê

Topuze qiseykerdişê xo yê peyênî de veng kerd û vat: “Armancê sîstemê tirkî no yo ke şaro kurd û Abdullah Ocalan yewbînî ra dûrî bikewo. Çi destê ma ra bêro ma do bikerî. Tornê ma zî wirzî, reyna ma do fek dewaya xo ra nêverdî. Heta ke ma bibî ma do vera înan de sere çewt nêkerî. Wa ê zî serekê kurdan reyde ronişî û seba rayîrê çareserîye pêvînayîş bikerî. Do bêhuqûqî heta key dewam bikero. Dinya de qet kurdî nêqedîyenê. Dinya de û her ca de kurd û heme şarê bindestî şîyar bîyî. Sîstem dewaya kurdan ra weye beno. Do na dewa qet erdî de nêmana.”