Hemserekê CDK-Fyî Azad Doganî derheqê rayîrşîyayîşî de ke 10ê çeleyî de Parîs de beno, qisey kerd û vat: “Ma seba adalet û raştîye rayîr şinê. Çunke bê eşkerabîyayîşê raştîye adalet nêyeno temînkerdene.”

Sakîne Cansiz, Fîdane Dogan û Leyla Şaylemez, 9ê çeleyî 2013î de paytextê Fransa Parîs de ameyî qirkerdene. Cehd û israrê komelê kurdan û dostanê ci ra dima Fransa dosyaya qirkerdişê yewinî yê Parîsî bi behaneyê “sirê dewlete” padaye. Necipersayîşo bitesîr û çimgirewtişê qirkerdişê yewinî yê Parîsî, qirkerdişêkê neweyî rê ber akerd. Evîne Goyî, hunermend Mîr Perwer û welatperwer Abdulrehman Kizil zî 23ê kanûne 2022î de Merkezê Kulturê Kurdî yê Ahmed Kayayî de Parîs de ameyî qirkerdene.

Azad Doganî vat: “2013î de hêrîşo ke Parîs de qewmîya, suîqastêko sîyasî yo eşkera bî ke hirê cinîyê kurdî yê pêşengî hedef girewtî. Şarê kurdî seba eşkerabîyayîşê nê qirkerdişî, vetişê raştîye û temînbîyayîşê adaletî cehdêko zaf xurt û qerardar kerd.”
Doganî îfade kerd ke qirkerdişê yewinî yê Parîsî bi behaneyê “sirê dewlete” padaye: “Derheqê qirkerdişê dîyinî yê Parîsî de hîrê dosyayê cîya-cîyayî hazir bîyî. La dozgerî qebul nêkerd ke no hêrîş hêrîşêko terorî yo û bi sedemê sîyasî yo; qewmîyayîşî sey çalakîyêka kesêkî ya nîjadperest û dişmenê koçberan pênase kerd. Heta nika keyeyê ma hîrê rey îtîrazê huqûqî kerd. Dosya hema warê cipersayîşî de ya û nêeşka bikewê prosesê dozgerîye. Nika ma paweyê eşkerabîyayîşê tarîxê mehkeme yê.”

‘Vengê herkesî danê’
Doganî vat: “Ma seba adalet û raştîye rayîr şinê. Şarê kurdî 13 serrî yo wayîrvejîyayîşêko gird û birûmet mojnayo. Na serre ma venga heme şarê xo û dostanê xo danê ke seba vernîgirewtişê qirkerdişanê neweyan û hesabpersayîşê şehîdanê ma bivejîyê waran. Ma venga herkesî danê ke beşdarê rayîrşîyayîşî bibê ke vernîya Gare du Nordî de beno.”