Dadîya tepişteyê sîyasîyî Necla Alkane ard ziwan ke ê wazenê Ocalanî ra xebere bigêrê.

Tepişteyê dewaya PKK û PAJKî 27ê teşrîna peyêne ya 2023yî ra nata seba azadîya Serekê PKKyî Abdullah Ocalanî û çareserîya meseleya kurdan grevê vêşanîye de yê. Tepişteyan 4ê nîsane de safhaya diyîne ya grevê vêşanîye daye destpêkerdene. Goreyê ney tepişteyî mehkemeyan boykot kenê û nêvejîyê pêvînayîşan.

Zîndanê Eskîşehîrî de tepişte Cîhan Alkan zî grev de yo. Dadîya ey Necla Alkane ANFyî rê waştişanê tepişteyan ser o qisey kerd.

Dayîke Necla dîyar kerd ke lajê ci de xeylêk nêweşîyê kronîkî est ê û vat: “Lajê mi 20 serrî yo zîndan de yo û zîndan de tede xeylê nêweşîyî peyda bîyî. O anjîyo bî, amelîyat bî, tede fitiq û nêweşîya mîde û çermî zî est a. Lajê mi nêno berdene bi nêweşxaneyî. Pêro muracatê ma bêcewab manenê. Ma na rewşe qebul nêkenê.”

Dayîke Necla bale ante çalakîya tepişteyan ser û vat: “Dewlete xîret kena ke Rayberê Kurdan tecrîd bikera û bida vîrakerdene. La o qayde nêbeno. Tepişteyî çi wazenê ma zî ey wazenê. Ma sey dadîyanê tepişteyan rewşa Birêz Ocalanî meraq kenê. Heta ke waştişê înan qebul bibê ma do waştişanê înan bîyarê ziwan.”