Hemvervatoxa Partîya Çep a Keske û parlamentere Çîgdem Kiliçgun Uçare bala xo ante têkoşînê cinîyan ser û wina vat: “Ma vizêr zî tîya de bîyê, ewro zî tîya de yê. Ganî ma têkoşînê xo xurtêr û pîlêr bikerê. Ma do pîya ser bikewê.”

Hemvervatoxa Partîya Çep a Keske Çîgdem Kiliçgun Uçare kombîyayîş de qisey kerd. Uçare destpêk de kesê ke 5ê hezîrana 2015î de hêrişê Amedî de qetil bîyê yad kerdî. 

Uçare dima pare kerd ke înan di weçînayîşê krîtîkî xo pey de verdayî û vat: ”Têkoşîno ke cinîyan kerd weçînayîşan ra dima zî do serkêşîya ma bikero. Netîceya weçînayîşan de bi têkoşînê Partîya Çep a Keske û HDPyî ma 29 parlamenterê cinîyî şawitî parlamentoyî, heqê temsîlîya têdûşte û temsîlkarîya tewr xurte vist destî. Parlamentaranê ma yê cinîyan têkoşînê cinîyan de hem kuçeyan hem zî parlamento de bi hawayêkê xurtî karî kerdî. Ma soz danê înan ke do hem parlamento hem zî kuçeyan bi xurtî bipawê. Têkoşînê cinîyan wayîrê rayîrêkê dergî yo. Vera hêrişanê AKP-MHPyî yê serê cinîyan û şîdetê dewlete-camêrdî têkoşînê ma do dewam bikero.

Ma netîceyanê weçînayîşî sey binkewtişêkî nêercnenê; çunke serkewtişê têkoşînê cinîyan pê weçînayîşan nêno ercnayene. Ma vizêr zî tîya de bîyê, ewro zî tîya de yê. Ganî ma têkoşînê xo xurtêr û pîlêr bikerê. Ma reyna pêro embazanê xo yê cinîyan rê têkoşînê înan de serkewtişî wazenê. Ma do pîya ser bikewê. Kuçeyî ê ma yê, têkoşîn zî ê ma yo.”