Reya yewine serra 2016î de bi Qerarnameyê Hukmê Qanûnî (KHK) qeyûmî tayînê şaredarîyanê HDPyî ameyî kerdiş û qeyûmî ewil dezgehê cinîyan hedef girewt, destkewtişê cinîyan raştê hêrişan ameyî. Dimayê qeyûman sîyasetmedarî tepişîyayî û vera HDPyî de dewaya qefilnayîşî ameye akerdiş. Weçînayîşanê herêmî yê adara 2019î de Partîya Demokrate ya Şaran (HDP) şaredarîya qezaya Erxenî ya Amedî zî tede bi temamî 65 şaredarîyî vistbî dest. La 60ê înan rê bi KHKyî qeyûmî ameyî tayînkerdiş û tena 5 şaredarîyî destê HDPyî de mendî.

Partîya Demokrasî û Têdûştîye ya Şaran (DEM Partî) startê xebatanê weçînayîşê herêmî yê 31ê adare Amed de da. Hemserekê pêroyî, parlamenterê DEM Partî bi namzetanê şaredarîye reyde çarçeweya xebatanê weçînayîşî de pêvînayîşê şarî rê dewam kenî. Namzet û hemserekî her ca de bi coşê şarî yenê pêşwazîkerdiş û seba tepîya girewtişê şaredarîyan lezîye daye xebatanê xo.

Derheqê babete de Hemsereka qezaya Erxenî ya DEM Partîye Bîrsen Azak Bayare qisey kerd. Bîrsene qala projeyê xo yê seba şarî kerd û bale ante serê xebatanê weçînayîşî ke çi aste de yê.

Bayare wina vat: “Semedê weçînayîşo ke do biqewimîyo ma verweçînayîşî kerdî û sey hemserek ma ameyî weçînayîş. Nika ma xebatêka weçînayîşî daya dest pêkerdiş û nê xebatan de coşê cinîyan vejîyeno aver. Coşê cinîyan sere de bi çend kesan dest pêkerd û nika bi hezaran cinî paştî danê ma. Her cinîya ke ma temas kenê, her cinîya ke ma berê ci piro danî, ma vînenê ke hîna bi hêz û serê payanê xo de vindenî. Nê semedî ra ma sey hemserekîye taybetî temsîlîyetê cinîyan fînenê aver û coka ra cinîyî hîna zêde pêyê ma de vindenî.”

Bayare ard ziwan ke pratîkê 4 serran ê qeyûmî raşte de yo û dewam kerd: “Qeyûmî serê polîtîkaya qirkerdişî ra şinê û netîceya nê polîtîkayan de ma vînenê ke cinî yena pelçiqnayîş. La xebata weçînayîşî de ma vînenê ke embazê ma yê cinî û hemrayê ma, şikîyayîşê xo yê ke zerrîya xo de ciwîyayî şikitî û erzenê teber. Ma ferq kenê ke cinî hîna bi hêz û kelecanin a.”

Bayare qala dezgehanê ke hetê qeyûmî ra ameyî girewtiş kerd û vat: “Hedefê ma no yo ke ma weçînayîşê 31ê Adare ra dima raşteyê ke bi destê qeyûmî ameyî girewtiş newe ra akerî û nê dezgehanê ma yê cinîyan de rêxistinbîyayîşêkê cinîyan ê xurtî pê bîyarî. Ma do na çarçewa de ewil kombîyayîşanê xo virazî û dima ra projeyê xo munaqaşa bikerî. Netîceya munaqaşayanê ma de xebatê ma do dest pêbikerî. Zîhnîyetê yewkî ma de çinî yo. Ma do projeyanê xo bi fikrêkê hemparî bivejnî raşte.”

Bayare vat: “Verê cû 8 dezgehê ma yê cinîyan û koperatîfê ma est bî. La dimayê tayînkerdişê qeyûmî raşteyê cinîyan game bi game ameyî girewtiş. La do zî çîyê ke destê ma ra ameyî girewtiş tepîya bigêrî û dezgehanê xo tepîya akerî. Ma do kursê meslekî akerî û semedo ke cinî hîna saxlem payanê xo ser de vinderî û vera zîhnîyetê serdestî de têkoşîn bikerî ganî hetê ekonomî de payê înan ê saxlem bibo. Projeyê ma zaf î. Ma do projeyanê xo hêdî hêdî bifînî cuye. Ma do pêyê kooperatîf, vilikan de projeyan virazî. Şar eleqeyêkê pîlî nîşanê sîstemê hemserekîye dano. Hetê ekonomî, rêxistinbîyayîş û meslekî ra talebê şarî ma ra zêde yo. Ma çi gam bierzî seba embazanê ma beno rolmodel. Coka ra ganî ma her gama xo de dîqat bikerî.”

Bayare tewr peynî bale ante serê xebata 8ê Adare û vat: “Vernîya ma de 8ê Adare est o. Ma do zî na roje de raşteyan de bibê û kişta embazanê xo de ca bigêrî. Semedê 8ê Adare ma ber bi ber gêrenî û na çarçewa de xebatê ma zî est î. 3yê adare de bi serkêşîya cinîyan do akerdişê buroyê ma yê weçînayîşî yê Yenîşehîrî bibo û ma do akerdişê buroyê weçînayîşî roja cinîyan rê nîyaz bikerî. Ma şarê xo û embazanê xo yê cinîyan silayîya na roje kenê û wa akerdişê buroyê ma sey mîtîngî derbaz bibo. Ma heme do bi siloganê ‘Jin, Jiyan, Azadî’ raşteyan de bibê. Nika ra 8ê Adare Roja Cinîyan ê Dinya pîroz bo.”