Yaraye ard ziwan ke weçînayîşanê 31ê adare de AKP Kurdistan de bîye partîya tabele û nê vatî: “Cayê ke DEM Partî ser kewt îtîrazê ci kerd, bi xîleyan kerd ke xesp bikero la Curnê Reş de ma reyna dî ke rixmê xîleyanê înan DEM Partî partîya yewin a. Îqtîdarê AKP-MHPyî dişmenê kurdan o. Tehemul nêkeno ke kurdî herra xo de nefes bîgêrê. Ça de yew destkewteyê kurdan est o, ça de statuyêk est o hêrişê ci kenê.

Her ca de wazenê cayê kurdan bikerê teng. Tecrîdê Îmraliyî zî leteyêkê nê yo. Ganî şarê kurdî vera nê zafêr rêxistinkerde têkoşîn bikero. Bi qeyûman îradeyê şarê kurdî xesp kenê, benê sebebê şewatan û mudaxale nêkenê. Ma şewatê Şemrex û Çinarî de nêzdîbîyayîşê înan reyna dî. Cuya kurdan ercan vînenê. Merg, surgun û şewat qederê kurdan nîyo. Şarê kurdî vera zextan û hêrişanê dewlete wayîrê şaredarîye, xoza û kulturê xo vejîyeno. Sîstem çend hêrişê xo bizêdîno, şarê kurdî do têkoşînê xo xurtêr bikero.”

Yaraye bale ante elemananê bankamatîkan ser ke semedê provokasyonî şawîyenê verê şaredaran û nê vatî: “Kesê ke çirey şaredarîye de nêxebitîyayî û têna sereyê menge de bankamatîk ra maeş ancenê, verê şaredarîye de slogananê heqî erzenê. Ma zanê ê kam ê. Şaredarîyanê ma na babete de çîyo ke hewce keno kerd. Ê çend wazenê ma hedef bimojnê ra, raştîye werte de ya. Gama ke pereyê înan birîya, verê şaredarîyan de ke çirey nêameyî tîya, xeymî nayî ro. No zîhnîyet do bin bikewo. Ma do destûr medê înan ke şarî bidiznê.”