Li paytexta Urdun Emmanê di 25ê tebaxê de, di navbera şandeyeke amerîkî ku ji Senatora Amerîkayê Jeanne Shaheen û endamê Kongreya Amerîkayê Joe Wilson pêk tê û şandeya Rêveberiya Xweser a Bakur û Rojhilatê Sûriyeyê ku ji Fermandarê Giştî yê HSDê Mazlûm Ebdî û hevseroka Daîreya Têkiliyên Derve Îlham Ehmed pêk tê de, hevdîtin pêk hatibû. Piştî civînê hatibû diyarkirin ku di hevdîtinê de pêkanîna peymana 10ê Adarê ya di navbera Fermandarê Giştî yê HSDê Mazlûm Ebdî û serokê hikûmeta Şamê Ehmed El Şerî hatiye nîqaşkirin. Şandeya DYAyê piştgiriya xwe ya bi HSDê re nîşan daye.

Li gorî agahiyên ku çavkaniyek ji Rêveberiya Xweser dane ANHAyê di hevdîtinê de danûstendinên navber Rêveberiya Xweser û hikûmeta Şamê de, astengiyên derdikevin holê û çareseriya pirsgirêkan jî hatine gotûbêjkirin. Di çarçoveya pergala nanevendî de mijara entegrasyonê hatiye nîqaşkirin û li ser çawaniya wê hatiye rawestandin. Çavkanî da zanîn ku hewildanên ji bo hevdîtinên Rêveberiya Xweser û hikûmeta Şamê berdewam dikin, lê ev hevdîtin wê kengî pêk were ne diyar e.