Bi hezaran gelê Ukraynayê ji bo protestokirina gefên Rûsyayê yên li dijî welatê xwe daketin kolanan. Li paytexta Ukrayna, Kievê gel bi xwepêşandanekê serokê Rûsyayê Vlademîr Putîn şermezar kirin û li ber awazên marşa xwe ya neteweyî sloganên li dijî gefên Rûsyayê qêriyan.
Xwepêşandêran sloganên wekî ‘ Ukrayna dê li ber xwe bide’, ‘bijî welatê me û bimire dijmin’, ‘Ukrayna yek parçe ye’ berz kirin û bi van sloganên xwe re wêneyên xêzkirî ên Vlademîr Putîn li kêleka Sedam Huseyin, Muemer Qedafî û Slobodan Miloseviç jî hildabûn.
Li kêleka van sloganan jî daxwaza Ukraynayê ya tevlêbûna NATO’yê jî bi sloganan dihate dubare kir. Tevî ku şertê bingehîn ê Putîn ew e ku Ukraynayê dest ji daxwaza xwe ya tevlêbûna NATO’yê berde.
Hêjayî gotinê ye ku zêdeyî mehekê ye Rûsyayê leşkerên xwe li ser sînorê Ukraynayê bicih kiriye û wekî gefekê bikar tîne. Pê re jî di serî DYA gelek welatên rojava metirsiya destwerdana Rûsyayê tînin ziman û ew yek bandorê li ser jiyana gelê Ukrayna û aboriya wê dike. Lewre gelek caran rayedarên Ukraynayê jî bang li wan welatan kir ku ev bang û nûçeyên wan zirarê didin aboriya Ukraynayê.
