Şerê navxweyî yê Sûdanê berdewam dike. Agirbesta ku ji bo 24 saetan di navbera aliyan de hatibû îlankirin bi dawî û li welat careke din şerê dest pê kir. Li gorî agahiyên ku ji herêmê hatin wergirtin 10 deqe piştî bidawîbûna dema agirbestê li paytext Hartûmê şer ji nû ve geş bûye û şêniyên paytextê bi topbaran û dengê şer hişyar bûne.
Li gorî Neteweyên Yekbûyî, ji 15’ê nîsanê ve herî kêm hezar û 800 kes di şer de jiyana xwe ji dest dane û zêdetirî milyon û nîv kes jî neçar mane ku ji cih û warên xwe koç bikin. Rêxistinên mafên mirovan, destnîşan dikin ku ji destpêka şer ve sûcên giran tên kirin.
Destdirêjiyên komî
Federasyona Mafên Mirovan a Navneteweyî (FÎDH), diyar kir ku hêzên şerker sivîlan weke mertalên zindî bi kar tînin. Nûnera Sûdanê ya Servîsa Jinê ya Neteweyên Yekbûyî Adjaratoû Ndîaye, bal kişand ser destdirêjî û êrîşên zayendî yên li dijî jin û zarokan û got ku di şer de “destdirêjiyên komî” hatine kirin.
Wezîrê Karên Derve yê Amerîkayê Antony Blînken, roja çarşemê di serdana xwe ya Erebistana Siûdî de ragihandibû ku wê Washîngton û Riyad ji bo bidawîkirina şer ‘yekîtiyeke xurt’ ava bikin.
