Şevê din artêşa Iraqê li navenda bajêr li taxa Yermûk a navenda bajarê Şengalê kemîn avêt pêş seyareyeke şervanên YBŞê û wesayît hate gulebarankirin. Li gorî agahiyên fermî yên Navenda Ragihandin û Çapemeniyê ya YBŞê di encamê de yek jê giran sê şervan birîndar bûn.

Piştî êrişê artêşê gelek hêzên cûda yên Iraqê sewqî nava bajarê Şengalê kirin û rewşeke awarte çêbû û hîn jî rewş li herêmê aloze.

Îro Rêveberiya Xweser a Şengalê tevî hemû saziyên xwe ji bo nerazîbûn nîşana êriş û provakasyona hêzên Iraqê bidin, ji aliyê Şemal ê Şengalê di Serdeşta Çiyayê Şengalê re bi karwanek ji gel xwestin derbasê nava bajarê Şengalê bibin lê aliyê seytereya artêşê ya dikeve navbera Çilmêran-Şengal ku ji wê herêmê re dibêjin (amûd) tê astengkirin.

Ciwan û gelê Şengalê jî bi dirûşmeyên, ‘Bijî Berxwedana YBŞê’ bertek nîşana artêşê didin.

Aloziya navbera gel û artêşê de dewam dike. Leşkerên Iraqê dixwazin pêşî li jinan û dayîkan bigirin û gel bi çek ditirsînin.

Têkildarî rewşa dawî hîn Fermandariya YBŞê daxuyaniyek fermî ne daye.

Hêjayî bibîrxistinêye ev provakasyon piştî nameya Rêberê Gelê Kurd Abdullah Ocalan a ji bo Êzidiyan çêbû.