Hemasê di 7’ê cotmehê de bi navê “Tofana Aksayê” li dijî Îsraîlê êrîşeke berfireh pêk anî. Di êrîşê de Hemasê gelek îsraîlî kuştin û gelek jê jî dîl girtin. Piştre jî Îsraîlê li dijî Şerîda Xezayê êrîşeke mezin da destpêkirin. Îsraîl niha li navenda Xezayê ji bejahî û hewayî şerê Hemasê dike. Di vî şerî de zêdeyî 20 hezar kesan jiyana xwe ji dest dane û çend qat kesî van kesên jiyana xwe ji dest dane jî malbatên endam û rêveberên Hemasê ji Xezayê koçber bûne.
Tevî ku du meh di ser şer derbas bûye jî welatên mîna Tirkiyeyê ku qaşo serkêşiya nerazîbûna li dijî Îsraîlê dikin jî heta niha tu çalakiyeke şênber nekirine. Berovajî piştgiriya Îsraîlê dikin. Erê di gotinê de dibêjin Îsraîl dewleteke “terorîst” e, lê di pratîkê de Îsraîl dewleta hevpar û hevkar e. Her çiqas têkiliyên dîplomatîk ji bo kêmkirina bertekên li dijî wan bi Îsraîlê re hatibin qutkirin jî têkiliyên wan ên aborî mîna berê bi Îsraîlê re didomin.
Piştgiriya kuştinê dike
Gotin di cih de be li ser van têkiliyên aborî Îsraîlê şerê li dijî Hemasê “xweş” dike. Bi gotineke din ji ber ku ev têkilî pê re tên domandin Îsraîl dikare jin û zarokan bikuje. Yanî dewletên mîna Tirkiyeyê her çiqas di gotinê de bertek nîşanî Îsraîlê bidin jî bi pratîka xwe ya têkiliyên aborî piştgiriya kuştina bi hezaran jin û zarokên filistînî dikin. Li gel hemû kujeriya wî jî ma Erdogan nebû çend roj berî ku şerê Îsraîl û Hemasê dest pê bike bi Benyamîn Netanyahû re hevdîtin kir û ew vexwend Tirkiyeyê.
Tirkiye bixwe ji şerê Îsraîl û Hamasê sûd werdigire û dixwaze şer bike xizmeta dijberiya kurdan. Hefteya borî bi nûçeyeke ku Ajansa Nûçeyan a Hawarê (ANHA) da polîtîkaya Tirkiyeyê ya vê der barê de bi awayekî zelal derket holê. Li gorî ANHA’yê Tirkiyeyê hejmareke zêde malbatên Hemasê yên ji Xezayê derketine li Rojava û Bakur û Rojhilatê Sûriyeyê bi cih dike. Bêguman armanca Tirkiyeyê ya ji vê bicihkirinê ne piştgiriya mirovî û starbûna mexdûrên şer e; dixwaze demografiya herêmê biguherîne û ji kurdan xalî bike.
Plana nû ya Tirkiyeyê
Ev planeke nû ya danîna kemberekê ye! Ev kember jî “Kembera Hemasê” ye. Çawa ku di salên 1970’yî de rejîma Baasê bi hinceta temambûna gola Tebqayê û tijebûna gola Esad li rojavayê Kurdistanê dest bi Kembera Erebî kir, niha jî desthilata AKP-MHP’ê dixwaze li dijî destkeftiyên Rojava “Kembere Hamasê” bike dewrê. Ji bo vê planê mabe wê Tirkiye têkiliyên xwe yên aborî yên bi Îsraîlê re qut neke û piştgiriya kuştina jin û zarokên filistînî bike.
Her çiqas ev plan weke planeke Tirkiyeyê bê dîtin jî ji bo demeke dirêj wê xweşa Îranê jî biçe. Lewre daxwazên wê yên ku di hevdîtinên Astanayê de nikare bi cih bîne bi vê plana Tirkiyeyê bi awayekî xwezayî tên bicih; Îran dixwaze ku di bin navê “serweriya” rejîma Baasê de herêm bikeve kontrola wê. Heke plana ku tê kirin biçe serî wê Îran bigihîje mexseda xwe û wê bikaribe Hamasê bi Rejîma Baasê tercih bike.
Tişta li ser kurdan ferz dikin!
Din planeke wiha de wê kurd winda bikin. Wê li erdnîgariya kurdan guhertina demografik pêk bê û di hêla siyasî de mudaxaleyeke giran ku wê bi salan nikaribin encamên wê ji holê bên rakirin, bê kirin. Di vê rewşê de divê ku ev xetere ji hêla kurdan ve bê dîtin. Ji ber vê sedemê jî li her kurdî ferz e ku li dijî vê planê derkeve; bi dîplomasiyeke xurt destûr nede ku demografiya herêmên dagirkirî bêguhertin û mudaxaleyên wiha qirêj ên siyasî li herêmê bên kirin.
