Muhemed Sûdanî yê ku ji bo Serokwezîrtiya Iraqê hatiye pêwirdakirin da xuyakirin ku hewldanên ji bo avakirina hikûmeta Iraqê berdewam dikin. Her wiha anî ziman ku lijneyeke taybet ji bo wê armancê hatiye avakirin û ew hevdîtinên bi namzetan re berdewam dike.
Lê di rastiya xwe de nakokiyên di navbera aliyên siyasî de gelekî zêde ne û derdikevin holê. Her wiha nakokiyên di navbera aliyên şîa de bandora xwe li ser derenghiştina avakirina desteya wezîran dike.
Li gorî rojnameya (El Şarq El Awset) yek ji nakokiyên sereke ên di navbera aliyên siyasî de ku li ser hev nakin, desthilatiya saziya ewlekariyê ye. Li ser mijara desthilatiya saziya ewlekariyê nakokiya herî zêde di navbera (Tevgera Hiqûq) ya nêzî Hizbulahê û Tevgera (Asaîb El Heq) ya bi serokatiya Qeys El Xezelî ye.
Her wiha tevgera (Ketaîb El Îmam Elî) jî dixwaze wezareta Karên Hundir bidest bixe. Lewre pêşbaziya vê yekê di navbera Serokê Heşdî El Şabî Falih Feyad û rêveberiya (Çarçoveya Kordînasyonî) de ye.
Hêjayî gotinê ye ku avakirina hikûmetekê li derverekî wekî Iraqê ya ku gelek mezheb û netewên cuda û hebûna milîs û komên çekdar gelekî zor û zehmete. Her aliyek ji wan aliyan berjewendiyên partî û tevgera xwe di ser berjewendiyên gelê Iraqê re digire, lewre jî nakokî û kelemên li pêşiya vakirina hikûmeteke nû berdewam dikin.
