Çalakiyên protestoyî yên li dijî desteserkirina şaredariyên Bajarê Mezin ê Mêrdînê, Êlih û Xelfetiyê dewam dikin. Li navçeya Dêrikê ya Mêrdînê meşa bi meşaleyî li dar xistin. Girseya ku li ser banga DEM Partiyê li ser rêya Dêrik-Qoser kom bûn, bi pêxistina meşaleyan û dirûşmeyan dest bi meşê kirin. Parlamentera DEM Partiyê Salîha Aydenîz û Hevşaredara Bajarê Mezin ê Mêrdînê Devrîm Demîr tevlî meşê bûn. Di meşê de dirûşmeyên, “Bijî Serok Apo”, “Dîsa dîsa serhildan Serokê me Ocalan”, “Jin, Jiyan, Azadî” û “Ji qeyûmê re na, rêz ji îradeyê re” berzkirin û stran gotin. Meşê heta Qada Dêrikê dewam kir. Hevşaredadr Devrîm Demîr li vir bang li gel kir û diyar kir ku bi salan in tê xwestin berxwedana gel bitepisînin û gelê Kurd rûbirûyê êrîşên cuda têne hiştin. Demîr anî ziman ku 8 sal in bi qeyûman re polîtîkayeke taybet tê meşandin. Demîr bi lêv kir ku bi salan in gund û malên Kurdan têne şewitandin, lê ruxmê vê jî Kurd bi berxwedana xwe hatine asta xwerêvebirinê û wiha berdewam kir: “Em îradeya gelê xwe ne. Gelê me li pişt me ye, em li gel gelê xwe ne. Em polîtîkaya ku me înkar dike nas nakin. Em ê teqez nas jî nekin.”
Piştre Parlamentera DEM Partiyê Salîha Aydenîz mafê axaftinê girt û anî ziman ku ew ê her tim li pişt îradeya xwe bin û wiha dirêjî da axaftina xwe: “Ne 3 car hûn 300 car jî qeyûmê tayîn bikin, gelê Kurd wê kesên bi hilbijartinê diyar nebûnê nas nekin. Ev rê ne rê ye, ev rêya tasfiye yê ye, jiyana bi hev re tasfiye dike. Ev rê azadiyê ji holê radike. Rêberê Gelê Kurd Abdullah Ocalan muxatabê çareseriyê ye. Em vê bi awayekî eşkere dibêjin. Eger hûn dixwazin îro bi gelê Kurd re aştiyê bikin, rêya vê li Îmralî ye. Keremkin herin Îmraliyê.”
Piştî daxuyaniyê banga tevlîbûna mitînga “Demokrasî û Azadiyê” hat kirin ku wê 17’ê Mijdarê de li Êlihê bê lidarxistin.
