Amedspor di 10’ê îlonê de li Stadyûma Amedsporê bi Duzcesporê re lîst. Amedsporê, Duzcespor 2 û 0 têk bir. Li hemberî Amedsporê ku ev 7 sal in bi qedexeya alîgiran re rû bi rû ye helwesteke nû ya cihêkariyê hat zêdekirin. Miduriyeta Polîsan a Amedê bi hinceta qanûna bi hejmara 6222’yan ketina sehayê ya tîma sedyeyê ya Amedsporê salekê qedexe kir.

Komeleya alîgiran ragihand

Komeleya Alîgiran a Amedsporê têkildarî mijarê daxuyaniyek da. Di daxuyaniya têkildarî bûyerê de agahî hate dayîn de wiha hate gotin: “Piştî ku futbolvanê Duzcesporê xwe berda erdê, dema tîma sedyeyê futbolvan li ser sedyeyê bi cih kir, futbolvan lingê xwe hejand. Pişt re hakem hat û qertê zer da futbolvanî. Tîma sedyeyê karê xwe domandiye, futbolvan bi sedyeyê derxistiye derveyî sehayê û vegeriyayeye cihê wî. Bûyera di şahidiniya 20 hezar alîgirên li stadyûmê, rayedarên TFF’ê, rêveberên tîmê û çavdêrvanan qewimî TFF’ê jî bi awayekî fermî cezayek nedaye, Miduriyeta Polîsan a Amedê ji tîma sedyeyê re cezayê ketina sehayê birî ye.”

‘Em li cem tîma sedyeyê ne’

Komeleya Alîgiran a Amedsporê anîn ziman ku helwesta miduriyeta polîsan qebûl nakin û bal kişandin ser helwesta miduriyeta polîsan û wiha got: “Em vê helwestê qebûl nakin û dixwazin ji vê biryarê vegerin. Em diyar dikin ku em ê bi rêveberiya kuluba xwe re bin û bibin şopdarên rewşê. Em li cem tîma sedyeyê ne.”

Dê biçe îfadeyê bide

Hate diyarkirin ku yek ji kesên di tîma tenduristiyê ya Amedsporê de dixebite îro çûye Miduriyeta Polîsan a Amedê û dê îfadeyê bide.