Hunermend Kasim Taşdogan xwest li kafeyeke li Taxa Kooperatîfler a navçeya Yenîşehîrê ya Amedê konserek bide. Zabiteyên girêdayî Şaredariya Yenîşehîrê ku di bin rêveberiya qeyûm de bi polîsan re bi angaşta “destûr nehatiye girtin û îxbara qerebalixê” xwestin konserê asteng bikin. Zabite û polîsan bi vê hincetê xwediyê kafeyê Ramazan Şîmşek hişyar kirin û gefa “heke konser bidome em ê ceza li te bibirin” xwarin. Li ser vê yekê jî konser bêyî hoparlor bên bikaranîn domiya. Guhdaran, stranên Taşdogan pê re gotin û konser bi coşeke mezin bi dawî bû.

Xwediyê kafeye Şîmşek, bertek nîşanî vê rewşê da û ev tişt got: “Ya ku tê kirin, bêtehemûliya li dijî kurdî ye. Ev kolan, kolana hunerê ye. Kolana Amedê ye û kolanekî çandî ya bajarê me ye. Em ê heta dawiyê çanda xwe bijîn. Piştî 10 salan, me hunermendekî kurd ê navdar anî vê derê. Lê hinek kes ji vê aciz bûn. Em jî dibêjin ‘bila aciz bibin.’ Em ê wan hêj bêhtir aciz bikin. Dê berxwedana me bidome.”