Federasyona Navdewletî ya Civakên Xaça Sor û Heyva Sor bi daxuyaniyekê banga alîkariya lezgîn a navneteweyî ji Afganistanê re kir û diyar kir ku li wî welatî bi milyonan mirov ji ber xizanî û birçîbûnê di bin metirsiyê de ne.
Li gor daxuyaniya Federasyona Navdewletî ya Xaça Sor û Heyva Sor, germaya zêde û hişkesaliyê li Afganistanê hilberîna çandiniyê tine kiriye, ji sedê 70’ê malbat nikarin pêdiviyên xwe yên bingehîn ên xwarin û tenduristiyê bi cih bînin, sê milyon zarok jî di bin xetera kêmxwarinê de ne û bi hezaran kes li Afganistanê ji ber bihayên giran ên kelûpelên bingehîn dest bi parsekiyê li kolanan kirine.
