Li gorî daxuyaniya berpirsê ‘Rêveberiya Fêrkirinê ya Xwecih’ a Talîbanê, li Afganistanê li 3 dibistanên seretayî derdora 90 xwendekarên keç û mamosteyên jin hatin jehrîkirin.
Ji destpêka ku Talîbanê di tebaxa 2021’ê de desthilata Afganistanê bi dest xistiye, sûc û binpêkirinan li dijî jinan zêde bûne. Talîban zextan li jinan dike û mafên wan ên perwerde, kar û çûna deverên giştî binpê dike.
Li gorî medyaya Afganistanê, duh (4’ê Hezîranê) li Dibistana Fayîzabad a seretayî ya li herêma Kalan a parêzgeha Sancharak 14 xwendekarên keçîn hatin jehrîkirin.
Di 2 rojên derbasbûyî de jî, li 2 dibistanên keçan ên li herêma Kabdabê 75 xwendekar û 4 mamoste hatin jehrîkirin. Mamoste û xwendekarên hatin jehrîkirin birin navendên tenduristiyê yên li bajarên Sarpul û Sancharak.
Di van demên dawîn de li Îran û Afganistanê jehrîkirina keçan zêde bûye. Têkildarî bûyerên jehrîkirinê û sedemkarên wan de tu agahî nehatine parvekirin.
