Ji 8ê çileyê heta niha gelê Bakur û Rojhilatê Sûriyeyê li dijî êrîşên li ser Bendava Tişrînê xwe kirine mertal û bendavê diparêzin. Heta niha Tirkiyeyê bi dehan caran bi SÎHAyan êrîşî çalakvanên li ser bendavê kiriye. Heta niha zêdeyî 26 welatî hatin kuştin û nêzî 250 welatî birîndar kirin. Têkildarî van êrîşan Cîgirê Hevserokê Kongra Îslama Demokratîk a Bakur û Rojhilatê Sûriyeyê Mazin Harûnî nirxandin kir. Mazin Harûnî li ser armanca nobeta mertalên zindî ku li ser Bendava Tişrinê ji 8ê çileyê ve hatiye destpêkirin axivî û got: “Dinya hemû ji jêr heta jor van kiryarên li ser Bendava Tişrînê pêk tê temaşe dike. Li Bendava Tişrînê li dijî kiryarên hov û faşîst ên li ser gel, berxwedanek bêsînor heye. Kiryarên li ser bendavê têne kirin, kiryarên talanker û terorîstî ne. Gel li dijî van kiryaran berxwedaneke dîrokî nişan didin. Bendava Tişrînê çavkaniya jiyana bi sed hezaran mirovan e. Bi sed hezaran mirov hemû pêdiviyên av, elektrîk, çandinî, cotkarî û pêdiviyên jiyanê ji vir temîn dikin. Hemû çandinî û cotkariyên wan li ser vê avê ye. Erzaq û zexîreyên sed hezaran gel li ser çandinê ye. Çandinî jî li ser vê avê ye. Îro kesên êrîşî bendavê dikin jî dixwazin çavkaniya jiyanê ya sed hezaran mirovan qut bikin. Tecrûbeyên me yên berê li ser vê yekê hene. Berê dema Serêkaniyê dagirkirin û çavkaniya Elo kete destê wan, gelê Hesekê 6-7 salan bi hesreta ava vexwarinê jiyan. Bi van êrîşan dixwazin gelê herêmê ji ava vexwarinê bêpar bihêlin. Gel ji bo av, elektrîk û jiyanê neçare parastina çavkaniya jiyana xwe bike.”
Cîhan van êrîşan temaşe dike
Mazin Harûnî bal kişand ser zêdebûna êrîşan û wiha got: “Ji 8ê çileyê heta niha nêzî 50 welatî hatin kuştin û zêdeyî 300 kesî birîndar bûn. Hefteyek berê zêdetirî 70 kes birîndar bûn. Her roj êrîş dikin û welatî şehîd dibin. Dema gel li ser bendavê kom dibin û govendê digirin bi balafiran êrîş dikin. Raste rast êrîşî gel dikin. Dema gel parastina çavkaniya jiyanê dikin êrîş dikin. Lê em dibînin ku li tevahiya cîhanê civaka mirovahiyê vê rewşê temaşe dike. Cîhan van êrîşan temaşe dike. Cîhan bi çavên xwe dibîne, bi guhê xwe dibihîze û bi aqilê xwe tahlîl dike, lê îro li dijî van êrîşan gotinek nehatiye gotin û parastina van mirovan nayê kirin. Di van êrîşan de bi dehan mirov ji kal û pîran bigire heta zarokan hatine kuştin. Di 28ê çileyê de sûka bajarê Sirrînê bombe kirin. 12 welatî kuştin. Eger li gel rewşeke wisa mirovatî îro zalim û mazluman ji hev nas neke, wê demê pîvana mirovahiyê nema ye.”
Dewleta Tirk û çete êrîş dikin
Mazin Harûnî bal kişand ser armanca êrîşan û wiha axivî: “Îro ji ber ev welatî axa xwe û bajarê xwe diparêzin êrîşî wan dike. Ji bo bajar û herêmê têxin kontrola xwe êrîşî welatiyan dikin. Ku îro vir neparêzin dê gund, bajar û herêm vala bibe û dê têk biçe. Dê her kes koçber bibe û dê warê jiyanê nemîne. Ji bo talan û wêran bikin û dest bi qirkirinê bikin êrîş dikin. Îro Efrîn, Serêkaniyê û Girê Spî li pêş çavan in. Yên îro êrîş dikin Dewleta Tirk û çeteyên wê ne. Ev heqîqet li pêş çavê cîhanê ye. Kes nikare vê yekê înkar bike. Li ezmanî û bejayî êrîşî Efrînê kirin. Kesên bi çend qurişan xwe firotin Dewleta Tirk êrîş dikin. Ji Uygur, Ozbekistan, Sîna, Turkmenistan, Qirgisistanê hatine. Li bejayî çeteyên xwefiroş şer dikin û li ezman jî balafirên Tirkiyeyê şer dikin. Yê ku di 28ê çileyê de li bajarê Sirînê xist û 12 welatî kuşt Tirkiye bû. Yê li Efrînê 300 balafirên şer firandin Tirkiye bû. Yê li Serêkaniyê bi tang û topan şer kir Tirkiye bû.”
Mazin Harûnî bal kişand ser berxwedana gel a li ser Bendava Tişrinê û wiha got: “Tu kes nikare wesfê vê berxwedanê bike. Ev berxwedan bi gotinan nayê gotin. Yên bi çavên xwe nebine, bi guhê xwe bibhîze û hîs neke dê nikaribin bînin ziman. Di vê berxwedanê de destanê dinivîsin. Dê bi tipên zêrîn dîrokê binivîsin. Nifşên li peş me bên jî dê dîsa vê dîrokê binivîsin. Kal û pîrên 70-80 salî bi gopalên xwe, zarokên 10-15 salî bi gula destê xwe dîroka berxwedanê dinivîsin. Bi eşq û dîlan berê xwe didin parastinê. Bi çavê xwe cenazeyên xwişk û birayên xwe dibînin û li wan xwedî derdikevin. Ronahiya çavên mirovan hêzê dide berxwedanê. Îro bi sedan mirov canê xwe kirine mertal û bendavê diparêzin.”
Mazin Harûnî li ser piştgiriya li hemberî berxwedana Tişrînê jî rawestiya û wiha bi dawî kir: “Îro roj roja piştgiriya berxwedana Tişrînê ye. Roj roja rûmetê ye. Divê hemû kesên aşiqê azadiyê xwedî li vê têkoşînê derkevin. Meş û çalakiyên li Pirsûs, Nisêbîn û Ewropayê pêş dikevin cihê rûmet û şanaziyê ye. Lê têr nake. Gelê Rojava hêzeke pir mezin a manevî ji vê yekê digire. Di vê rewşê de ev têr nake. Hemû kesên dixwazin bi rûmet û azad bijîn û aşiqê jiyana hemû zindiyen li ser rûyê cîhanê bin, divê li ser piyan bin. Em parastina mirovahiyê dikin. Îro bendav Qamişlo, Hewler, Amed, Maku û hemû derê Kurdistanê ye. Bendav rûmeta mirovahiyê ye.
Mazin Harûnî li ser bêdengiya hêzên navdewletî ya li dijî êrîşan jî rawestiya û got: “Ev kesên ku îro dibêjin ez oldar û bawermend in, bêdengiya li dijî van êrîşan munafiqî ye. Di mejiyê wan de koletî hatiye çandin. Îro gelê kurd pêşengiya olê îslamê kiriye. Yê ji bo olê îslamê şer kiriye gelê kurd e. îro gelê kurd pêşengtî ji bo her kesî kiriye. Em ji bo hemû mirovên mazlum azadiyê dixwazin. Lê divê em ewil birînên xwe derman bikin. Divê em berê xwe azad bikin.”
