20ê Temmuza 2015î de bi seyan kesî seba şîyayîşê Kobanê û paştîdayîşê domananê Kobanê bajaranê cîya-cîyan yê Tirkîya ra arê bîbî û wexto ke Merkezê Kulturî yê Amara yê Pirsûsî de eşkerayî dayêne raştê hêrişêko bombeyin yê DAIŞî ameyî. Netîceyê teqayîşê bombeyin de 33 ciwanê Federasyonê Komeleyê Ciwananê Sosyalîstan (SGDF) cuya xo vindî kerdî û bi seyan kesî zî birîndar bibî. Bi serkêşîya SGDFyî 25 rêxistinê ciwanan seba serrgêra 5. yê Qirkerdişê Pirsûsî bi sernameyê ‘Seba Pirsûsî edalet, seba herkesî edalet’ kampanyayêka hunerî dabî dest pêkerdene û Weqfê Cigêrayîşê Huner Kultur Estetîk Perwerde û Zanistî (BEKSAV) kampanya bi siloganê ‘Seba Pirsûsî Berardene’ girewt milê xo sero. Kovara Kultur û Hunerî zî na hûmare de ca daye şehîdanê Suruçî. Hemsereka BEKSAVî Canan Kaplane qala Kovara Kultur û Hunerî ke na hûmare de ca daye 33 raywananê xeyalî ke hêrişê DAIŞî de cuya xo vindî kerdîbî, kerde.
Gama ewil ê kampanyaya semedê 33 raywananê xeyalî de, deyîrê ke şehîdê Pirsûsî ci ra heskerdêne hetê hunermendanê ke ê ci ra heskerdêne ra ameyî vatene. Deyîrê ke ameyî vatene serê kanalê Youtube ê BEKSAVî de ganî ameyî weşanayene. Gorselê ke ameyî yew hewte serê kanale de weşanîyayî. Tewr peynî zî BEKSAV hûmara taybet ê Kovara Kultur û Hunerî vet. Kovare de xeylê şîîr, hîkaye û resîmî estî. Sewbîna nuşteyê ke wextê qetlîyamî de hetê şaîr, nuştox û hunermendan ra ameyî nuştene zî kovare de ca girewtî.
Hûmara taybet ê kovare
Kaplane dîyar kerde ke resîm, şîîr, cerebnayîşî hîkaye û karîkaturê ke ameyî berardene semedê hûmara taybet ê Kovara Kultur û Hunerî arê dayî û wina va: “Kovare hirê beşan ra pê yena. Ma beşa yewine de cigêrayîşê ke Tirkîya, Ewropa, Kurdîstan û Rojawanî ra ameyî kontrol kerd. Beşa diyîne de ê tepişteyan. Beşa hirêne de zî nuşteyê ke qetlîyam dima ameyî nuştene û kovara Ozgur Gençî de ameyî weşanayene estî. Nê nuşteyî seba ke tesîrê yewine îfade kenî coka ma semed muhîm ê. Ma ca da nuşteyanê sey Îrfan Aktan, Sîbel Ozbudun, Ragip Varolî. Ma waşt ke derheqê no hîs kam ca de dest pêkerd û kam ca de qedîya de verîyêk bibo.”
Zîndanan ra eleqe zêde yo
Kaplane dewamê qiseykerdişê xo de daye zanayene ke kovare rê eleqeyêk gird esto û domnaye: “Tewrê zêde zîndan û keyeyan ra eleqeyêk gird esto. Wendoxê ma eşkenê serê înternet û kitabxaneyan ra biresê ma. Çapa yewine ê na hûmare tay mendo biqedîyo, çimkî tede 33 raywananê xeyalî û cuya înan esto. Mînak hîkayeya embazêk ke semedê embazê xo yê ke cuya xo vindî kerd û ci ra xeridnayebî, esto. Kesêk zî semedê embazê xo ê ke demêk ci reyde qisey nêkerd û bado ke qisey kerd embazê ci cuya xo vindî kerd, nuşte nuşt. Nuşteyê ciwan û cinîyan ke têkoşînê înan meşnenî estî.”
Wezîfeyê ma wayîrvejîyayîşo
Kaplane qiseykerdişê xo yê peyênan de bale ante têkoşînê edaletî ê semedê 33 raywananê xeyalî ser o û wina qedênaye: “Tena têkoşînê 33 raywananê xeyalî nîmcet nêmend, xeyalê înan zî nîmcet mend. Temamkerdişê xeyalê înan semedê ma wezîfek o. Pirsûs, hîkayeya ciwanê ke semedê şahidîya şorişî Tirkîya ra şîyî Kurdîstan, semedê awankerdişê bajarêk ke veşayo û rijîyayo, semedê awankerdişê pirdê ciwananê şorişgeran û semedê bîyayîşê parçeyêk ewja, ya. Cayo ke faşîzm xo hende berz bîyo parçe parçe keno de wezîfeyê ma wayîrvejîyayîşo.” STENBOL
