Parlamentera DEM Partî ya Dêrsimî Ayten Kordu cigêrayîşê zerdî yê bi sîyanurî rexne kerd û wina qisey kerd: “Madenî û HESî şarê herême rê nêpersîyenê û wina yenê awankerdene. Nê awbendî û madenî karê kolonyalîzmî yê.”

Kordu pare kerd ke înan derheqê cigêrayîşê madenkarîye yê bi sîyanurî de Wezîrîya Vurîyayîşê Awhewayî, Şaristanîye û Xoza rê vernîyazêk dayo û vat: “Wezîrî persanê ma ser o vat ‘Zerarê nê cigêrayîşî weşîya merdiman rê çin o. Kontrolî ameyî kerdene û asta tewr berze de cezaya pereyî dîyaye.’ La ma zanenê ke şîrketa madenî newe ra dest pê karî kerdo. No jehrê madenan herême ra derbazê çimeyanê awe beno û Çemê Firatî ra xo resneno heta Bafra. Nê kîmyewîyî benê sebebê zeraranê cidîyan.”

Kordu projeyê madenkarîye sey kolonyalîzmî pênase kerdî û vat: “Madenî û HESî şarê herême rê nêpersîyenê û wina yenê awankerdene. No Kurdistan de sey polîtîkaya şerê taybetî yeno caardene. Nê awbendî û madenî karê kolonyalîzmî yê. Wexto ke cayêk de kultur, ziwan û bawerîya şarî çin bihesibîyê û çîyo ke şarê herême rê feyde nêkero bi sîyanurî bêro vetene hem merdimî bêrê asîmîlekerdene hem zî çimeyê ci bêrê talankerdene hînî nameyê nînan kolonyalîzm o. Nê karê madenan ganî hêverî şarê herême, rêxistin û dezgehanê herême rê bêrê persayene û rizaya nînan bêra girewtene. Derdê AKP-MHPyî reyna zêdînayîşê qezencê xo yo. Coka erdê ma pêşkêşê sermaye keno.”