1emîn Konferansa Parlamenterên Jin ên Kurd ku bi pêşengtiya Tevgera Jinên Azad (TJA) li Amedê tê lidarxistin, di roja duyemîn de didome. Konferans, li Navenda Kongreyê ya Çand Amedê tê lidarxistin. Aktîvîstên TJAyê, parlamenterên ji Kurdistan, Rojhilata Navîn û Ewropayê û nûnerên partiyên siyasî tev li konferansê bûn. Lip eywana konferansê bi zimanên Kurdî, Tirkî û Erebî pankarta “Jin siyaseta demokratîk dimeşînin, civaka demokratîk ava dikin” û flamayên “Jin, jiyan, azadî”, “Cinîya azad komelo azad” û “Jin azad dibe civak azad dibe” hatin daliqandin. Her wiha gelek jin bi cil û bergên neteweyî tev li konferansê bûn.
Roja duyemîn a konferansê dê bi atolyeyan bidome.
Atolyeyên dê di nava rojê de bên lidarxistin ev in:
* Atolyeya Sakîne Cansiz: Li dijî siyaseta mêrê serdest, di pêşxistina siyaseta demokratîk de pirsgirêkên rêxistinkirinê yên parlamenterên jin û pêşniyarên çareseriyê.
* Atolyeya Leyla Qasim: Rol û polîtîkayên parlamenterên jin ên di mijara yekitiya neteweyî de.
* Atolyeya Hevrîn Xelef: Di parastina jinan de li dijî tundî û cihêkariya li dijî jinan, têkoşîna hevpar.
* Atolyeya Mîna Qazî: Di nava pirçandiyê de bandora nûnertiya jinan a siyasî ya li ser aştiya civakî û demokratîkbûna siyasetê.”
Tê payin ku piştî nîvro di çarçoveya pêşniyarên ji atolyeyan hatine girtin de encamnameya konferansê bê aşkerakirin.
