Nuştox Sean Michael Wilsonî vat ke fikrê Serekê PKKyî Abdullah Ocalanî konfederalîzmo demokratîk seba pêro dinya modelêk o.

Nuştoxê xêzeromanî Sean Michael Wilson bi nameyê “Freedom Shall Prevail: The Struggle of Abdullah Ocalan and Kurdish People (Azadîye Do Ser Bikewa: Têkoşînê Abdullah Ocalanî û Şarê Kurdî)” kitabêk nuşt. Kitab nika yeno açarnayene bi almankî, kurdkî û tirkî.

Wilsonî da zanayene ke ey bi rayîrê Înîsîyatîfê Mîyanneteweyîyî fikrê Ocalanî şinasnayê û vat: “Mi xeylêk xêzeromanî nuştî. Dima yewî mi rê pêşnîyaz kerd ke ma Kurdistanî ser o kitabêkî amade bikerê. O çax mi xêrê embaza xo, dosta kurdan Estella û Înîsîyatîfê Mîyanneteweyîyî ra Kurdîstan û Abdullah Ocalanî ser o agahîyî girewtî.”

Wilsonî bale ante Hemleya ‘Abdullah Ocalanî rê Azadîye, Meseleya Kurdan rê Çareserîya Kurdan’ ser û vat: “Dinya de zaf merdimî est ê ke hayîya înan pê kurdan çin a. Ez hêvî kena ke kitabê mi bi hîna zaf ziwanan bêro weşanayene û derheqê kurdan û Kurdîstanî de merdiman hayîdar bikero. Fikrê Abdullah Ocalanî konderalîzmo demokratîk modelêkê metodê birêxistinkerdişê dinya yo. Ocalan bi ney modelêk pêşkêş keno ke verê sîstemê kapîtalîstî de alternatîf o. Xora xêzeromanê mi de no zî est o.”