Endamê Desteya Hevserokatiya Partiya Yekîtiya Demokratîk (PYD) Salîh Muslim der barê komploya navdewletî ya li dijî Rêberê PKK’ê Abdullah Ocalan pêk hat, pirsên ajansa nûçeyan ya ANF’ê bersivandin.

Salîh Muslim di nirxandina xwe ya der barê komploya 9’ê Cotmehê de anî ziman ku Kurdistan ji bilî êrîşên dagirkerî yên leşkerî, bi êrîşên aborî û dîplomatîk re rû bi rû ye û got: “Amadekariyên me yên ji bo têkoşîna li dijî hemû êrîşan didomin. Em çiqasî rêxistinbûyî bin, em ewqasî dikarin xwe biparêzin.”

Armanca komplogeran

Muslim di bersivên xwe de komplo wekî rojeke reş binav kir, behsa armanca komplogeran kir û wiha got: “Dibe ku me pêşî wateya dîroka 9’ê Cotmehê fêm nekir, lê bi demê re her ku bûyerên nû pêk dihatin, çi bûye-nebûye tev bi awayekî vekirî derket holê. Ji bo vê em dikarin bêjin ku komploya 9’ê Cotmehê destpêka pêvajoyeke nû ye. Weke ku em dizanin hêzên hegemon qala Rojhilata Navîn a Mezin dikirin. Xuya bû planên mezin li pişt maseyan hatine kirin. Ev planên ku niha di pratîkê de ne, bi 9’ê Cotmehê re dest pê kirin. Ya pêşî amadekarî bû, di 9’ê Cotmehê de dest bi komployê kirin. 9’ê Cotmehê li dijî Rêberê Gelê Kurd Birêz Ocalan dest bi vê komployê kirin.”

DAIŞ bi ser me de dehf dan

Muslim di nirxandinên xwe de behsa pêvajoya sala 2012’an û nêzîkatiya dewleta tirk jî kir û ew pêvajo wiha nirxand: “Heya pêvajoya sala 2012’yan. Piştre dema dîtin ku em xurt dibin û kes nikare li hemberî me bisekine, ji bo li hemberî me nekevin nava şer xwestin ‘dostaniyê’ ava bikin. Em her tim ji bo berjewendiyên gelên herêmê ji diyalogan re vekirî bûn. Li ser vê bingehê em çûn Tirkiyeyê. Me dît ku dixwazin me bikin leşkerên xwe û me bixin xizmeta xwe. Em nehatin vê lîstikê. Me got nasname û pirsgirêkên me qebûl bikin û çareser bikin, dema ku encam derneket DAIŞ’ê bi ser me de dehf dan. Bi vê yekê re pêvajo bi temamî guherî. Xwesteka wan bi cih nehat û dest bi êrîşa li dijî me kirin.”

Hedef ne tenê Rojava bû

Muslim hedefa êrîşên li dijî Rojava jî wiha dinirxîne û dibêje: “Çawa ku em difikirin pirsgirêka Kurdistanê bi hev ve girêdayî û bi bandor e, plana wan jî ne tenê li dijî Rojava ye, di heman demê de li dijî tevahiya Kurdistanê ye. Kurdek li ku derê mafê xwe bi dest bixe, dijminatiyê li wî dike. Ew li dijî projeyên Rêberê Gelê Kurd ên Neteweya Demokratîk û yekîtiya civaka demokratîk in. Armanca bingehîn a planên desthilatdariya tirk bi taybetî di sala 2014’an de tunekirina kurdan û qedandina Têkoşîna Azadiyê ya Kurdistanê bû. Tiştên li Rojava diqewimin jî di çarçoveya vê planê de pêk tên.”

Nêzîkatiya Enqere û Şamê

Muslim di hevpeyvînê de nêzîkatiyên di navbera şam û Enqerê de jî wiha dinirxîne û dibêje: “Êrîşên faşîzma tirk bandorên neyînî li ser pir aliyan dike. Ev êrîş li dijî hiqûqê ne. Çekên qedexe bi kar tînin, sûcê şer dikin, sûcê qirkirinê li dijî mirovahiyê dikin. Ji bilî van gelek êrîşên hovane kirine. Ev yek hemû bandorê li civakê dikin. Mînak bazirganiya narkotîkê û ji bo guhertina demografiya herêmê koçberkirina gel jî, sûcên li dijî mirovahiyê ne. Dewleta Tirk hem bi destê xwe, hem jî bi rêya çeteyên xwe van hemûyan bi rengekî vekirî li pêş çavên cîhanê dike. Tenê li dijî noqteyên leşkerî êrîşan pêk naynin. Mînak sala borî, bi êrîşên xwe yên li ser binesaziya herêmê wekî nexweşxane, stasyonên elektrîk û avê û bîrên petrolê zirarên madî yên mezin çêkirin. Hovîtiyeke bi vî rengî li me kirin. Ev êrîşên berdewam li dijî herêmê nebana, wê rewşa li herêmê gelekî cuda bûya.”

Rêya sereke ya têkoşînê rêxistinbûyîna gel e

Der barê berxwedana Rojava de jî Muslim ev tişt anîn ziman û wiha got: “Weke Rojava em xwe amade dikin ku li dijî hemû êrîşan têbikoşin. Dema ku hêzên me yên leşkerî şer dikin û hêzên Asayîşê li dijî sûcên weke bazirganiya narkotîkê û bazirganiya mirovan têdikoşin, divê gelê me karibe bi awayekî hîn rêxistinbûyî alîkariyê bide hêzên xwe. Gelê me çiqasî rêxistinbûyî be, ewqasî dikare xwe li hemberî her şêwe êrîşan biparêze. Ya ji bo me girîng rêxistinbûyîna gel e. Dijmin ji dîrokê ve ji bo ku di navbera bawerî û etnîkan de nakokiyan çêbike dixebite û divê em li dijî vê hesas bin. Weke hemû gelan, hewcehiya me heye ku em bi hev re bijîn.”