Rayberê Şarê Kurdî Abdullah Ocalan 15ê sibata 1999î de paytextê Kenya Nairobî de ame tepiştene. Rayberê Şarê Kurdî Abdullah Ocalan o ke 24 serrî yo Girawa Îmraliyî de sey esîr yeno tepiştene û pêvînayîşê avûkat û keyeyan yeno astengkerdene. Ocalan 24 serrî yo vera tecrîdê Îmraliyî têkoşîn dano. Bado ke Ocalan ame berdene Îmraliyî, 17ê sibata 1999î de Îmrali sey herêma qedexekerde ya leşkerî ame îlankerdene û îdareyê Zîndanê Îmraliyî Wezîrîya Edaletî ra ame girewtene û dîya Buroyê Îrtîbatî yê Krîzî yê Îskeleyê Mudanya.
Rayberê Şarê Kurdî Abdullah Ocalan mabênê 9ê teşrîna verêne ya 1998î û 15ê sibata 1999î de mîyanê Atîna, Moskova, Roma û reyna Moskova û Tacîkistanî de û tewr peynî Girawa Korfuyî ya Yunanistanî ra ame remnayene û berdene paytextê Kenya Nairobî. Her çend ke hetê nimite yê komployî bêrî zanayîş zî hema tay hetê ci eşkera nêbîyî. Yeno zanayîş ke gişta xeylê welatanê komplogeran nê kompleyî de esta. Nê komployî de hedef şexsê Ocalanî de çinîkerdiş û bêvengkerdişê şarê kurdî bî. La şaro kurd wayîrê Ocalanî vejîya û amacê pêro komplogeran veng vet. Şarî bi felsefe û projeyanê rayberîye xerîteya xo dîyar kerde û felsefeya rayberîye kerd her hetê cuye. Projeyo ke Ocalanî seba Rojhelatê Mîyanênî viraştbî ewro Sûrîye de dekewt dewre û şarê herême badê bedêlanê giranan nika xo bi xo îdare keno.
Amacê komplogeran…
Komplogeran wexto ke dîyî bi esîrgirewtişê bedenê Rayberîye şaro kurd çinî nêbeno û bêveng nêbeno, na reye dest bi qedexekerdişê pêvînayîşê avûkat û keyeyan kerd. Komployê 15ê Sibate de ame waştene ke Ocalan bêro daliqnayîş. Bado ke no plan nêame caardene planê tecrîd û îşkenceyî kerdî dewre. Tirkîya bi nê polîtîkayan hem huqûqê xo hem zî huqûqanê Peymana Heqanê Merdiman ya Ewropa binpay kena. Komplogeran wexto ke dîyî amacê înan nêresa sere, na reye planê tecrîdî kerd dewre. Ewro zî îtîfaqo faşîst ê AKP-MHPyî çinîkerdişê kurdan esas gêno û nêverdeno ke fikrê Ocalanî vilayê teberî bibî. Coka ra pêvînayîşan asteng keno ke têkilîya Ocalan û şarî yewbînan ra abirîya.
Ocalanî ra xebere nîna girewtiş
25ê adara 2021î ra nata Ocalan û tepişteyanê bînan yê sey Omer Hayrî Konar, Hamîlî Yildirim û Veysî Aktaşî ra xebere nêna girewtene ke ê zî Îmrali de tepişîyenê. Muracatê avûkat û keyeyan bi bahaneyanê sîstematîkan yenê qedexekerdiş û ge-ge badê bi aşman yeno eşnawitene ke cezaya dîsîplînî dîyaye.
Dewrê AKPyî qedîyeno
Tirkîya hewl dana ke felsefeya Ocalanî asteng bikera û vernîya vilabîyayîşê fikranê ci bigêra. Tirkîya yanî îtîfaqo faşîst ê AKP-MHPyî baş zano ke şoriş bi rêxistinbîyayîşê şarî pê yeno. Seba ke no nêbo her veng û muxalîfê hemverê xo asteng keno û no zî eke mird nêkero bi raybazanê xo temamî çinî keno. Îtîfaqo faşîst ê AKP-MHPyî wazeno ke Tirkîya bikero yew tîp û reng. Kontrolê her çîyî û her kesî gênê xo dest ke bîyayîşê xo îdame bikerî. Nika AKP kewto mîyanê tersî ke vernîya ci de weçînayîş esto û fikirîyeno ke no weçînayîş do senî bêro sere. Pêro dek û dolabanê xo nika ra kerdo dewre û hema zî hewl dano ke şarî bixapêno. La peynîya xapênayîşan çino û elbet do rojêke şêro û şar asan bibo.
