Konseya Neteweyî ya Kurdistanî (KNK) bi eşkerayîyêke serrgêra 36ine de şehîdê Qirkerdişê Helebce yad kerdî. 

Eşkerayîye wina ya:

“16ê adara 1988î de Helebce de bi çekanê kîmyewîyan bi hezaran kurdî ameyî qetilkerdene, birîndar bîyî û wareyê xo ra bîyî. Wina aseno ke Qirkerdişê Helebceyî tarîxê kurdan de qirkerdişo peyên nêbîyo. Dewletê îşxalkerî bi qirkerdişanê winayênan armanc kenê ke kurdan çin bikerê.

Qirkerdişê Helebce mojna ke dişmenîya vera kurdan çend xorin a. No qirkerdiş verê çimanê dinya de ame kerdene û qet yew dewlete ci rê vengê xo nêkerd.

Ewro dewletê îşxalkerî heman senaryo newe ra tekrar kenê. Nê rojanê serrgêra Qirkerdişê Helebce de sere de dewleta tirke dewletê îşxalkerî, îqtîdarê AKP-MHPyî yo faşîst vera kurdan plananê qirkerdişî yê neweyan amade kenê. Yeno waştene ke dewleta Iraqî zî tewra nê planan biba. Hêzê PDKyî zî mîyanê nê planan de yê. Nê planî vera çar parçeyanê Kurdistanî û menfaetanê şarê kurdî tehdîtê pîlî yê.

Coka ma venga pêro hêzan, partîyan, rêxistinanê sîyasîyan, dezgehan, şarê ma yê Kurdistanî û kesanê wayîrwijdanan danê ke vera nê plananê îşxalkeran tewir bigêrê û verê qirkerdişanê neweyan bigêrê. Ancax bi nê hawayî ma eşkenê şehîdanê Helebce yad bikerê.

Ma şehîdanê Helebçe bi rêzî yad kenê. Ma soz danê ke seba yewîya neteweyîye erkanê xo bîyarê ca û vera dişmenê qirkerî têkoşîn bikerê.”