Komîsyono ke Meclîsê Tirkîya de partîyan ra awan bîyo, seba aştî û demokrasî yew firsetêko tarîxî yo. La tena na mesela bi nê komîsyonî çareser nêbena. Seba awankerdişê komelêkê demokratîkî, ganî heme komel, karker û heme mexdûrê sîstemî rolê xo kay bikerê.

Dinya zî dinyaya verêne nîya. Dinya de hinê na polîtîkaya înkar û îmha qebul nêveynena. Pîlanê ma vato; “Bi aleta çewte gureyo raşt nêbeno.” Îqtîdar, ganî fek polîtîkaya înkar û îmha û ziwanê şerî ra verrado. Bi polîtîkaya înkar û îmha yew aştîyêka heqîqî awan nêbena.

Ziwanê nîjadperestan

Dewleta Tirkîya, medyaya Tirkîya û tayê nîjadperestanê Tirkîya hima xo nêbedilnayo, hima zî polîtîkaya înkar û îmha rê xizmet kenê. Hima zî ziwanêkê negatîfî xebitnenê. Nê ziwanî ra yew çîy sadir nêbeno. Hima zî ziwanê şerî xebitnenê. Hukmatê AKP’yî, na medya û nê nîjadperestî slogana “Tirkîyaya Bêterore” xebitnenê. No ziwan, ziwanê pêameyîşî nîyo, ziwanê înkar û îmha yo. Xora şero ke nê çenday serrî yo ke dewam keno, sebebê nê şerî, na polîtîkaya înkar û îmhayî ya. Çi heyf ke hima zî yew qismê nîjadperestan, şer de israr kenê. Şer de israr yew gureyê aqilî nîyo. Na cografya bi gonîya ciwanan awdîyaya. Eke heq û huqûq esas bigêrîyo û sebebê şerî meydan ra hewanîyê, aştî zî asan awan bena.

Tirkîya û Rojawan

Çi heyf ke dewleta Tirkîya hima zî îradeyê kurdanê Rojawanî qebul nêkerdo. Vanê ke “Wa çekanê xo teslîmê hukmatê Colanî bikerê.” Sûrîye de semedê heq, huqûq, demokrasî, aştî û seyyewbînaneyî cayê xo bigêro; ganî yew qanûno ke heme etnîsîte bi ziwan û kulturê xo, bi bîr û bawerîya xo bi azad xo îfade bikero vejîyo. Yanî Sûrîye de çend heqê ereban est ê, ende heqê yê kurdan est o, ende heq ê durzîyan û yê elewîyan est o. Dewleta Tirkîya, hima zî nasname û ziwanê kurdanê Rojawanî qebul nêkedo. Nêwazenê ke kurdî wayîrê yew îradeyî bibê. Kurdan rê azadî rewa nêveynenê. Çîyo ke xo rê rewa veynenê kurdan rê rewa nêveynenê.  Vanê ke; “Kurdî Rojayî wa çekanê xo teslîmê Hukmatê Colanî bikerê.” Ma zî vanê ke; madem şima ende Colanî ra zaf hes kenê, şima çekanê xo teslîmê înan bikerê. Çîyo ke şima xo rê, şima kurdan ra wazenê. No teklîf, yew teklîfo exlaqî nîyo. Rayîrê aqilî yew o. Eke şima îradeyê kurdanê Rojawanî qebul bikerê û înan reyde pêbêrê, heme kes qezenc keno.

Kurdê Sûrîye

Kurdê Sûrîye hima zî raştê hêrişê DAÎŞ’î yenê, yewna het ra raştê hêrişê HTŞ û tayê gruban yenê. Yewna het ra ma zanê ke yewendes serrî ra ver DAÎŞ’î gala kurdan kerd. Waşt ke heme kurdan qetlîam ra vernê. No hêriş de, cinîy û keynekê kurdanê êzidîyan remnayê, bazaran de bi pereyan rotê.

Kurdî wazenê ke Sûrîye de şirîkê îqtîdarî bibê. No heqê înan yo rewa yo. Kurdî Tirkîye de zî wazenê wayîrê heqanê xo yê neteweyî û însanî bibê. No dewr de mîyanê etnîsîteyan, dînan û mezheban de cîyakerî xeyrê însanî yew têgeyr o.

Heq, huqûq û edalet

Kurdî wazenê ke çar leteyan de heme şarî reyra bi seyyewbînanî, çarçewaya heq û edaletî de, bi heqanê xo yê neteweyî û demokratîkan biciwîyê. Xora yew Komîsyonê Aştî û Demokrasî awan bîyo. Semedo ke na mesele kok ra çareser bibo, ganî no komîsyon, bi yew ferasetê objektîfî têbigeyro, ganî heq, huqûq û edaletî esas bigêro. Yanê mîyanê tirkan û kurdan de, mîyanê tirkan û şaranê binan de cîyakerî nêkero.

Komîsyonê Demokrasî û Aştî kombîyayîşê xo yo yewin kerd. Şarê ma pabeyo ke no komîsyon; rayîrê çareserîya meseleya kurdan û rayîrê ronayîşê demokrasî abikero.