Artêşa Tirkîya 28ê kanûna 2011î de Roboskî de vera şarê kurdî qirkerdiş viraşt. 19 domanî tede 34 kurdî netîceya bombevaranî de ameyî kiştiş. Hema zî edalet nêame caardene.
Qirkerdişê Roboskî ra dima 13 serrî vîyartî, la nê 13 serran de kiştoxî nêameyê cezakerdiş û cipersayîşê ke derheqê qirkerdişî de amebî destpêkerdiş zî tu netîceyêke nêdaye. Şarê Roboskî zaf domanê xo qirkerdişê Roboskî de vînî kerdî.
Doman û merdimanê Roboskî seba ke debara keyeyî bikerê, derbasê Başûrê Kurdîstanî bîbî. Înan waşt ke uca ra çay û şekir bîyarê. Na roje 34 dewijê Roboskî derbasê sînorî bîyê, la raştê hêrişê teyareyanê şerî ameyî û ameyî kiştiş. Verê qetilkerdişê domananê xo xeylêk dewijan cerdevanîye kerdêne, labelê qirkerdişê domananê xo ra dima înan êdî fek verada. Ê seba ke qetilkarê domananê înan bêrê cezakerdiş, peyê doza edaletî de yê.
Tirkîya de edalet
Qetilkerdişî ra apey serrî vîyartî, la hema zî kiştoxî nêameyî dariznayîş. Malbatê Roboskî zî wazenê edalet bêro caardene. Ê veng danê ke kesanê ke no qirkerdiş viraşt, wa bêrê cezakerdiş. Çi heyf ke Tirkîya de edalet çin o. Rayedarê Tirkîya waran de qîrenê û vanê Artêşa Tirkîya sivîlan nêkişena, la yeno persayîş “eke leşkeran no qirkerdiş nêkerdo, kamî kerdo?” Badê cû eşkera bî ke dewleta tirke no qirkerdiş kerdo. Nê teyareyê Amerîka û Rusya bîyê, teyareyê Tirkîya bîyê.
Şarê Roboskî neçarîye û feqîrî ra bîyo cerdevan, yanî bi zerrîya xo nêbîyo cerdevan. Qirkerdiş ra dima înan çekê dewlete nêhawanayî û nê çekî veradayî. Waştişê înan têna edalet o û ê wazenê ke peynîya nê qirkerdişan bêro.
Erdoganî fîraz kerd
No dem Erdogan serekwezîr bî û cade fermandarê qirkerdişî fîraz kerd. Wezîrê Karanê Zereyî zî bi qisaya xo “ê cara qeçaxçî bîyê” qirkerdiş meşrû kerd. Yanî ey bi hawayêkê zelalî şarê Roboskî terorîst nîşan da. Nê meşrûkerdişî rayîr da dezgehanê selahîyetdaran ê bînan zî. Serdozgerîya Komare ya Amedî tehqîqatêk akerd, la verê ke proseso huqûqî bêro destpêkerdene tehqîqat ame qefilnayene.
Îfadeyê mesuldaranê qirkerdişî nêame girewtene. Îqtîdarê AKPyî zî seba ke proseso huqûqî nêro destpêkerdiş, pêro hêzê xo seferber kerdî. Îqtîdarî kerd ke keyeyanê 34 qurbanan bi tepiştiş û destbendkerdişî bêveng bikero.
Qirkerdiş dîya xovîrrakerdiş
AKPyî seba ke no qirkerdiş bêro xovîrrakerdiş, Amed de Peykerê Roboskî rijna û Komeleya Seba Roboskî Edalet, Seba Dinya Aştîye (Roboskî-Der) qefilnayî.
Proseso huqûqî yê Qirkerdişê Roboskî wina bî:
-16ê kanûna 2011î de Davut Encu, Servet Encu û Haci Encu yê ke qirkerdiş ra weş xelisîyabî “qeçaxçîtîye” ra Fermandarîya Artêşa Tirke de îfade da.
-2012 de Serekwezîrîye vat ke ê do tazmînat bidê keyeyanê qurbanan la keyeyan no qebul nêkerd.
-Serdozgerîya Komare ya Amedî derheqê fermandaranê Artêşa Tirke de tehqîqat akerd la dima tehqîqat erşawîya Dozgerîya Artêşa Tirke.
-BDPyî qirkerdiş berd Mehkemeya Ceza ya Mîyanneteweyîye.
-Komîsyonê Roboskî yê Komîsyonê Heqanê Merdiman ê Meclîsî raporê “dewijî qestî ra nêameyî kiştene” amade kerd û bi rayanê wekîlanê AKPyî rapor ame qebulkerdiş.
-Dozgerîya Artêşa Tirke derheqê 5 fermandaranê xo yê mesuldaranê qirkerdişî de bira teqîbnêkerdişî daye.
-Keyeyanê qurbanan 2014 de muracatê Mehkemeya Qanûnê Bingeyî kerd la mehkeme bi îdîaya ke “dokumentî kêm ê” dewa red kerde.
-Merdimanê qurbanan 2016 de muracatê Mehkemeya Heqanê Merdiman a Ewropa kerd la na mehkeme zî dewa red kerde.
