Nîjadperesto tirk Onur Gencero ke 17ê hezîrane de eşt bînaya HDPyî ya Îzmîrî ser û pê 6 guleyan Denîz Poyraze qetil kerde tepişîya.

Nîjadperesto tirk Onur Gencer vizêr kişta polîsan ra vîyart kewt bînaya Partîya Demokratîke ya Şaran (HDP) ya Îzmîrî û Denîz Poyraze qetil kerd, dima zî kerd ke bîna bido adirî ver. Nîjadperest Gencer hêrişî ra dima amebi destbendkerdene û hetê mehkeme ra tepişîya.

Hêrişî ra dima polîsanê tirkan dest na kamerayanê esnafanê dormeyî ser û dîmenê kamerayan pakî kerdî.

Goreyê xebera Ajansê Mezopotamya polîsan dîmenî girewtî û format eşt dîmenan ser. Eşkera bi ke Onur Gencerî rê menga gulane de ruhsatê çeke dîyabi. DW Turkçeyo ke îfadeyê Gencerî vist dest pare kerd ke Gencer menga çeleyî ra nata hêriş plan kerdêne.

Kiştoxî qirkerdişî ra dima hesabê xo yê whatsappî ra fotografê Denîz Poyraze vila kerd. Fotografanê Gencerî yê ke hesabê ci yê instagramî de vila bîyê eşkera kerd ke Gencer hetê dewleta tirke ra ameyo perwerdekerdene û erşawîyayo Sûrîye. Hêriş dima ke Serekkomarê Tirkîya Recep Tayyîp Erdogan û hemkarê ci yê faşîstî MHPyî HDP kerd hedef qewimîya.