Keyeyê Şenyaşarî bale ant ser ke rixmê bira tepiştişî zî 3 serrî yo Îbrahîm Yildiz nêame destbendkerdene zî.
Emîne Şenyaşara ke laj û mêrdeyê ci hetê merdimanê Wekîlê AKPyî Halîk Îbrahîm Yildizî ra kişîyayî lajê xo Ferît Şenyaşarî reyde 56 rojan ra nata nobeta edaletî de ya. Şenyaşarî semedê qedexeyê tebervejîyayîşî keye de nobete rê dewam kenê.
Keyeyê Şenyaşarî fotografo ke tede destê birazîyê H. Î. Yildizî Îbrahîm Yildizî de çeke esta, pare kerd û vat: ”No şexso ke bi sebebê mergê di merdimanê ma birazîyê wekîlî Îbrahîm Yildiz o. Derheqê ey de bira tepiştişî esta la 3 serrî yo mîyanê şarî de gêreno. Birazîyê wekîlî rê dest nêdîyeno pa? Edalet ho ça de yo?”
Se bibî?
Qezaya Pirsûsî ya Riha de 24ê hezîrana 2018î de hetgir û teraftarê parlementerê AKPyî Halîl Îbrahîm Yildizî semedê raywaştişî Pirsûs şîbî zîyaretê esnafan. Yildiz û teraftarê ci dikana Şenyaşaran de hêrişê keye kenî û munaqeşeyan de mêrdeyê Emîne Şenyaşare Haci Esvet û lajê ci Adil û Celalî kiştibî. 2ê nîsane de 3. Mehkemaya Cezaya Girane ya Meletî Fadil Şenyaşarî rê 37 serr û 9 aşmî û Enver Yildizî rê zî 18 serrî ceza birnabî. Keyeyê Şenyaşaran semedê caardişê edaletî 50 rojî yo ke verê edlîyeya Rihaye de û demê qedexeyan de zî keyeyê xo de nobeta ‘Edaletî’ tepişenê. RIHA
