Emîne Şenyaşar û Lajê xo Ferît Şenyaşarî çalakîya xo ya nobeta ‘Edaletî’ ke verê berê edlîyeya Riha de dabî dest pêkerdene, roja 50. de domnenê.

Emîne Şenyaşara ke laj û mêrdeyê ci hetê merdimanê Wekîlê AKPyî Îbrahîm Halîl Yildizî ra kişîyayî 50 rojî yo lajê xo Ferît Şenyaşarî reyde verê Edlîyeya Riha de nobeta edaletî rê dewam kena. Keyeyî twitter de no mesaj pare kerd: ”Hema zî ê qala huqûq û edaletî kenê. 3 merdimê ma nêweşxaneyê dewlete de kişîyayî! Hema zî kesêk nêtepişîya. Kamerayan ra nêbo înan do bivatêne ‘doktoran nê merdimî kiştî.’ Raştîye werte de ya. Nika seba ma edalet û huqûq çin ê.”

Se bibî?

Qezaya Pirsûsî ya Riha de 24ê hezîrana 2018î de hetgir û teraftarê parlementerê AKPyî Halîl Îbrahîm Yildizî semedê raywaştişî Pirsûs şîbî zîyaretê esnafan. Yildiz û teraftarê ci dikana Şenyaşaran de hêrişê keye kenî û munaqeşeyan de mêrdeyê Emîne Şenyaşare Haci Esvet û lajê ci Adil û Celalî kiştibî. 2ê nîsane de 3. Mehkemaya Cezaya Girane ya Meletî Fadil Şenyaşarî rê 37 serr û 9 aşmî û Enver Yildizî rê zî 18 serrî ceza birnabî. Keyeyê Şenyaşaran semedê caardişê edaletî 50 rojî yo ke verê edlîyeya Rihaye de û demê qedexeyan de zî keyeyê xo de nobeta ‘Edaletî’ tepişenê.