Keyeyê Gulîstan Dokuye yo ke semedê vînayîşê kênaya xo bi waştişê pêvînayîşî verê Wezîrîya Edaletî de çalakîye roniştişî kerde hetê polîsan ra bi erdî ra kaşkerdişî ame destbendkerdene.

Wendekara Unîversîteya Munzurî Gulîstan Dokuye Dêrsim de 5ê çeleyê 2020î ra nata vînîbîyaye ya. Keyeyê Dokuye seba ke aqîbetê kênaya xo bimuso Dêrsim de ‘Nobeta Edaletî’ dabî destpêkerdene. Dima ra çalakîya xo kirişte Anqara. Dadîya Gulîstane Bedrîye, babî Halît û waka ci Aygul Dokuye waşt Wezîrîya Edaletî de pêvînayîş bikero la waştiş ame redkerdene. Naye ser o keyeyî verê berî de çalakîya roniştişî daye destpêkerdene.

Keyeyî tîya eşkerayîye daye. Aygul Dokuye ard ziwan ke AKP înan dir pêvînayîş nêkerdo û vat: ”Ma wazenê meclîs wa derheqê vînîkerdişê Gulîstane de cigêrayîş bikero û heta ke waştişê nêro ca ma do Anqara canêverdê.” Dayîke Bedrîye Doku zî waşt wa vera keyeyê Zaynal Abrakovî cipersayîş bêro kerdene û vat a dewlete ra kênaya xo wazena.

Keyeyî waşt Wezîrê Edaletî Bekîr Bozdagî reyde pêvînayîş bikerê. Polîsan mudaxale kerd la rixme naye keyeyê Doku verê Wezîrîya Edaletî ra nêşi. Babî Halît Dokuyo ke vera polîsan vejîya bi erdî ra kaşkerdişî ame destbendkerdene. Dima ra dayîke Doku zî ameye destbendkerdene. Keyeyê Doku semedê kontrolî ame berdene Nêweşxaneyê Dewlete ya Fatîhî. ANQARA