Hemsereka ÎHDyî Eren Keskîne pare kerd ke îtîrafê Mehmet Eymurî mojnenê ke aqlê dewlete nêvurîyayo û vat: ”Nika aqlê dewlete yê serranê 90an serê karî de yo.”
Serekê verênî yê Dayîreyê Kontraterorî yê MÎTî Mehmet Eymurî T24 rê qisey kerdbi û vatbi: “Eke îmkanê bînî yê qiseykerdişî nêbê îşkence beno, çunke tîpê serewişkî zaf ê.”
Nê îtîrafê Eymurî ra dima Weqfa Heqanê Merdiman a Tirkîya (TÎHV), Merkezê Pêroyî yê Komeleya Heqanê Merdiman (ÎHD) zî xo amade kenê ke gerre bikerê. Hemsereka ÎHDyî Eren Keskîne îfade kerd ke îtîrafê Eymurî eşkera kenê ke aqlê dewlete qet nêvurîyayo.
Keskîne ard ziwan ke Eymurî îşkence pawito û vat: “Dewleta tirke peymanê Neteweyanê Yewbîyayeyan (NY), Peymana Heqanê Merdiman a Ewropa îmza kerdî. La Eymurî eşkera vat ke înan zaf îşkence kerdo û o îşkence meşrû vîneno. Rixmê ney zî derheqê Eymurî de tehqîqat nêdîya destpêkerdene. Çunke vateyê Eymurî polîtîkayê dewlet ê. Eymurî vat ke Mehmet Agar kokainman o. Sedat Pekerî zî çîyê winasênî eşkera kerdbî. Pekerî zî sey Eymurî derheqê tay wextan de qet qisey nêkerd. Yanî ê tay kesan pawenê. Derdê înan xo pakîkerdiş nîyo hesabgirewtiş o. La înan dewlete pawite.”
Keskîne vist vîrî ke Eymurî vatbi dewlete merdimanê pakîyan nêşuxilnena û vat: “1915, 1938, 12ê êlule ra heta 90an cara dewlete pakîye nêwaşte. Eymurî pê vateyanê xo Teşkilat-i Mahsusa nîşan kerd. Eymur îtîraf keno ke înan 18 kesî semedê pereyan kiştê. Nê prosesî 90an de bi cînayetê Vedat Aydinî dest pêkerdbi û xeylêk merdimî o çax kişîyabî. Nika aqlê dewlete yê serranê 90an serê karî de yo. Cara qedîyayîşê prosesê çareserîye û xîretê darbeya 15ê temmuze ra dima pêro aktorê serranê 90an serê karî de aktîf ê.” Çime: ANF
