Hemsereka Pêroyî ya ÎHDyî Eren Keskîna ke rojnamegere Esra Solîn Dale Zîndanê Bakirkoyî de zîyaret kerda, derheqê rewşa aye de ANFyî rê ercnayîşî kerdî.

Keskîne da zanayene ke Esra rê teyna cigêrayîşo rût nêameyo ferzkerdene û Esra rê bi zorî ame ferzkerdene ke a wa belgeya ‘ez endama rêxistine ya’ îmza bikera.

Keskîne pê hesna ke Esra hucre de mîyanê tecrîdî de ya, hîrê rojan werd nêdîyayo aye û di rojan qetî hucre ra nêameya vetene. 

Keskîne vat: “Îdareyê zîndanî xîret kerd ke bi zorî bi Esra belgeya ‘ez endama rêxistine ya’ bido îmzakerdene. Esra no kerdiş qebul nêkerdo û verê ci vejîyaya. No kerdişê îdareyê zîndanî kerdişêko bêqanûnî yo. Esra waşt ke hucre ra bêra vetene û koxûş de bêra tepiştene. Ganî komel, muxalefet û dezgehî vera kerdişanê winayênan tewirê xo bimojnê.”

Keskîne ard ziwan ke Solîne xebatanê xo yê rojnamegerîye ra tepişîyaya û vat: “Xora wextê mehkeme de aye rê persê sey ‘Ti çira xeberanê winayênan kena’ ameyê perskerdene. Dewleta tirke Peymana Heqanê Merdiman a Ewropa îmza kerda la goreyê ci tênêgêrena. Destbendkerdiş û tepiştişê rojnamegeran nênê qebulkerdene. Nê kerdişî kerdişê dîktatorîye yê.”