Hevserokatiya Konseya Rêveber a KCKê li ser wefata yek ji Dayikên Aştiyê Emîne Ocak peyama sersaxiyê weşand. KCKê di beyama xwe de xemgîniya xwe parvekir û destnîşan kir ku dê têkoşîna Dayika Emîne û hemû xizmên windayan, têkoşîna wan a ji bo azadî û demokrasiyê ronî bike.

KCKê di peyama sersaxiyê de destnîşan kir ku ew bi xemgîniyek mezin bi wefata Emîne Ocak ku bi têkoşîn, berxwedêrî û lêgerîna edaletê tê nasîn ku yek ji kesayetên sembol ên Dayikên Şemiyê ye, hesiyan û wiha got: “Em ji malbat, xizm û gelên xwe re, bi taybetî ji Dayikên Şemiyê re sersaxiyê dixwazin. Dayê Emîne ku bi têkoşîna xwe ya bi biryar û israr a ji bo dîtina aqûbeta kurê xwe Hasan Ocak ê piştî Komkujiya Gazî ya Stenbolê ji aliyê çete, polîsên dewletê, mafya û hêzên kontra ve di 12yê Adara 1995an de hat binçavkirin, ji bo hemû xizmên windayan bûye çavkaniya cesaret û hêzê. Dayê Emîne di 27ê Gulana 1995an de li Qada Galatasarayê pêşengî ji çalakiyên xizmên kesên ku ji aliyê hêzên dewletê ve bi darê zorê hatin windakirin kir û di tevahiya jiyana xwe de ti carî dest ji têkoşîn û lêgerîna edaletê berneda û di berfirehkirina têkoşînê û pêkhatina bîra civakî de roleke girîng lîst.”

Di dawiya daxuyaniya xwe de KCKê ev tişt got: “Têkoşîna sembola lêgerîna edalet û heqîqetê ya Dayikên Aştiyê Dayê Emîne û hemû xizmên windayan wê têkoşîna me ya ji bo sosyalîzm, azadî û demokrasiyê ronî bikin. Em soz xwe dubare dikin ku em ê xeyalên wan ên ji bo aştî, edalet û demokrasiyê pêk bînin. Em careke din ji malbata Ocak, xizm û gelên xwe re, bi taybetî ji Dayikên Şemiyê re sersaxiyê dixwazin.”