Eşkerayîya KCK’yî de xoverdayîşê vera hêrişanê hêzanê hukmatê vêrâdayîşî yê Şamî yê Helebî ame selam kerdene û veng dayene hêzanê sîyasîyan hemîne ke seba caardişê Mutabaqatê 10ê Adare hewl bidê.

KCK’yî her wina veng da hêzanê mîyanneteweyîyan ê ke aştî û aramîye Sûrîye de wazenê ke bi rolê xo kay bikerê.

Eşkerayîya KCK’yî wina ya:

“Tirkîya de nika prosesê Aştî û Komelê Demokratîkî yeno muneqaşekerdene û bi nameyê Îdareyê Vakur û Rojhelatê Sûrîye û hukmatê demkî yê Şamî heyetî pêvînayîşan kenê, destpêkerdişê hêrişanê Helebî rewşêka cidî ya. Eşkera ya ke hêrişê hêzanê çekdaran ê girêdayeyê hukmatê Şamî yê taxanê Şêxmeqsûd û Eşrefîye yê Helebî rasterast vera kurdan ê. Nê hêrişî eynî wext de hewldayîşêk ê ke gefî ameyoxê komel û şaranê Sûrîye, şarê erebî yê Helebî werdê. Yeno waştene ke hêrişê qirkerdişî yê ke verê cû vera komelê durzî û elewîyan ameybî kerdene, Heleb de bêrê dibarekerdene. Nê hêrişî îşaretê planêko tehluke kenê ke amancê ci reyna geşkerdişê şerê zereyî yê Sûrîye yo. Na dema ke pêvînayîş Şamî reyde ameyêne kerdene, destpêkerdişê nê hêrişan bi hemdemî Heleb de nîyetê Şamî nano verê çiman.

Pêvînayîşanê 4ê Çeleyî yê mîyanê heyetan de her çiqas nêzîkbîyayîşêko wina ame nîşandayene ke muzakereyî dewam bikerê zî, destpêkerdişê şerî nîşan dano ke planêko stratejîk dewre de yo. Coka hema peyê pêvînayîşê 4ê Çeleyî yê mîyanê Îdareyê Vakur û Rojhelatê Sûrîye û hukmatê vêradayîşî yê Şamî de destpêkerdişê hêrişanê taxanê Şêxmeqsûd û Eşrefîye, nîşan dano ke Şam seba şerî amadekarîye kena. Hêzê ke vera awankerdişê Sûrîyeya demokratîke ya bi metodê muzakere û dîyalogî yê, şerî sor kenê û hewl danê serwerîye Sûrîye de pêk bîyarê û menfaatanê xo garantî bikerê.

Wazenê na yewe bi qurbankerdişê şaran bikerê. Têkilîya dewleta Tirkan a bi hukmatê Şamî û tayê komanê çekdaran ê warî reyde verê çiman de ya. Eke dewleta Tirkan dest sîyasetê xo yê gefwerdiş û şerkerdişî ra verado û nêzîkbîyayîşêko awanker û çareserî nîşan bido, a do xizmetê aştîya herême bikera. Eke dewleta Tirkan seba caardişê peymanê 10ê Adare bi rolêko pozîtîf kay bikero, tesîrê xo yê serê komanê çekdaran hetê pozîtîfî ra bierjno, ziwanê xo û polîtîkaya xo hetê çareserîya sîyasî ra bişuxulno, afernayîşê atmosfero aştîye bikera.

Kurdanê Helebî vera DAIŞ’î û xeylê komanê çeteyan ê faşîstan vera hêrişan bi bedelanê pîlan bi serran xover da, heta roja ewroyî xover da û eşkayî xo bipawê. Teberê xoverdayîşê vera hêrişan û pawitişê estbîyayîşê xo, kurdî serê hukmatê demkî yê Şamî yan zî serê hêzêko bînî tu wext nêbîyê gefêk. Heleb de şarê kurd-erebî wayîrê kulturê cuye yê hempare yê pîya yê. Hêrişê serê kurdan seba koçberkerdişê bi zorî yê şarê taxanê Şêxmeqsûd û Eşrefîye yo, pakkerdişê Helebî yê kurdan ra yo, sorkerdişê nakokîyanê ereb-kurdan o.

Coka hêriş vera sivîlan, cinî û domanan yeno kerdene. Sere de kurd û erebî, şarê Sûrîye do vera na zorbayîye heqê xo yê xoverdayîşê rewa bi rengê tewr bitesîrî bişuxulnê. Wezîfeya welatperwerîye ya ke şarê ma serê bingeyê yewîya neteweyî çar parçeyanê Kurdîstanî û teberê welatî de, bi ruhê Kobanê tewrê nê xoverdayîşî bibo û seferber bibo. Ma a bawerîye de yê ke kurdê Helebî do bi nêzdîbîyayîşê Tişrînî taxanê xo bipawê û kanşopîya xoverdayîşî dewam bikerê. Sere de kurdê ke Heleb de xover danê, ma şarê xo û rayapêroyîya demokratîke ke paştî danê xoverdayîşê Şêxmeqsûd û Eşrefîye, selam kenê.

Ma veng danê Şamî ke hêrişan demildest vinderno, veng danê terefan ke seba çareserîye agirbest îlan bikerê, aramîye pêk bîyarê û reyna ageyrê maseyê muzakereyî. Hewldayîşê hêzanê sîyasîyan ê seba caardişê Mutabaqatê 10ê Adare do menfaatanê şaranê Sûrîye û aramîya Sûrîye rolê xo kay bikero. Ma veng danê merdimîye û hêzanê mîyanneteweyîyan ê ke aştî û aramîye Sûrîye de wazenê ke verê na zorbayîye wurzê, seba çareserîya problemî bi metodê aştîyane û dîyalogî û pêardişê agirbestî yê bi lezgînî bi rolê xo kay bikerê.”