Endamê Komîteya Rayberdişî ya PKKyî Murat Karayilanî îfade kerd ke dewleta tirke şer wazena û vat: “Şero ke ma Kurdistan de kenê, şerê estbîyayîş û pawitişî yo, şerê azadîye yo. Ma wazenê herra xo de azad biciwîyê.”
Endamê Komîteya Rayberdişî ya PKKyî Murat Karayilanî ANFyî rê qisey kerd.
Karayilanî dîyar kerd ke ê wazenê persgira kurde bi dîyalog çareser bikerê û vat : “29 serrî yo Rayber Apo semedê çareserîya sîyasîye têgêreno. Heta nika pêro pîya ma 9 rey adirbirnayîş îlan kerd. Nizdê hîre serran binê çimdarîya heyetanê mîyanneteweyan de mabênê dewleta tirke û ma de pêvînayîşê Oslo ameye kerdene. Netîceya nê pêvînayîşan ya ke hetê wird hetan ameye qebulkerdene, sey protokolî 2011î de teslîmê hukmatê Erdoganî bîyî. 2012î de dewleta tirke reyna kewte tengayî. Reyna adirbirnayîş kewt dewre. Na rey Îmrali de di serrî û nême pêvînayîşî ameyî kerdene. Ûca zî kerd pêsare. Heyetê wird hetan verê kamareyan de mutabakat wend û îmza kerd. Dima ra Erdoganî masaya Domabahçeyî qeldaye û no mutabakat qebul nêkerd. Çarçewaya konseptê neweyî de vera ma şêro gird da detpêkerdene.”
Karayilanî qiseykerdişê xo wina dewam kerd: “Ma haştîye wazenê coka tim wina gaman erzenê. Ma wazenê meseleya kurde bi rayîr û metodanê demokratîkan çareser bikerê. Seba ke dewleta tirke naye nêwazena ewro Kurdistanî de şer esto. Şero ke ma Kurdistan de kenê, şerê estbîyayîş û pawitişî yo. Şerê azadîye yo. Ma wazenê herra xo de azad biciwîyê. Ma hêriş nêkenê, dewleta tirke hêriş kena. Ma çareserî wazenê la dewleta tirke wazena ma çîn bikera. Ma ewro her wextî ra zafêr çareserî û azadîye rê nêzdî yê.”
