Hemserekê DEM Partî yê Anqara Fatih Kanato ke tewrê mîtîngê pîlî yê Colemêrgî bî ANFyî rê qisey kerd.

Fatih Kanatî ard ziwan ke bajarê Kurdistanî bi mentiqê îdareyê pêtî yenê îdarekerdene û wina vat: “Îqtîdarî nêverdenê ke çirey cografyaya Kurdîstanî bê OHAL û îdareyê petî bimano. Badê pêkewtişanê 15 temmuze hinî qanûnî bi temamî ameyî wedaritene û dişmenîya vera kurdan dahîna eşkera yena mojnayene. Têna kurdî nê kam ke paştî bido kurdan zî sey dişmenî yeno vînayene. Qeyûmî zî na çarçewa de yê. Bi qeyûman têna herinda şaredarî de walî û qaymeqaman ca nêkenê, bi nê caardişî yeno vatene ke şarê kurdî hemwelatî nîyo, kurdî çin hesibîyenê.

Mesaj eşkera yo, vanê yew qiymetê weçînayîşî çin o. Xora kurdê ke pîya bi ziwan û kulturê xo çin hesibîyenê vera nê zulmî bi heme estbîyayîşê têkoşînî kenê. Şar xora vera tecrîdê Îmraliyî û destsernayîşê heqanê tepişteyan dekerde yo. Rixmê heme zextan partîya ma semedê sîyasetê demokratîkî kerdo xo çeng. Ganî têkoşînê Colemêrgî dahîna bêro xurtkerdene, açarîyo têkoşînê azadîya komelkî û demokrasîyî. Destkewteyê nê têkoşînî zî do gird bê.”