Endamê Komîteya Rayberdişî ya PKKyî Duran Kalkanî îfade kerd ke rejîmê faşîst ê AKP-MHPyî do Zap de birijîyo û vat: “Sey 2021î nika zî Amerîka, NATO, PDK û Tirkîya pîya hêriş kenê. Aseno ke hukmatê Iraqî zî mîyanê nê hêrişan de yo.”
Endamê Komîteya Rayberdişî ya PKKyî Duran Kalkanî bi wesîleya 1ê Gulane Roşanê Karkeran ANFyî rê qisey kerd û tayê ercnayîşî kerdî.
Kalkanî ard ziwan: “Nê rojan de ke ma amadekarîya 1ê Gulane kerdêne faşîzmê AKP-MHPyî 17ê nîsane de hêrişê Zap û Avaşînî kerd. Dewlete 2016 ra nata hêrişê Herêmanê Pawitişî yê Medya kena. Şerî Xakûrkê û Heftanînî de dest pêkerd, dima vilayê Metîna, Zap û Avaşînî bî. Nê hêrişî merkezî hedef kenê. Dewlete wazena pêro Herêmanê Pawitişî yê Medya çin bikera.”
Kalkanî qiseykerdişê xo dewam kerd: “3 hedefî estê; çinkerdişê PKKyî, îşxalê pêro herêmanê kurdan û destvistişê tayê erdanê ereban. Dewlete û îqtîdarê AKP-MHPyî nê planî ser o şinê. Dewlete kena ke pê paştdayîşê Amerîka, NATO û PDKyî Avaşîn û Zapî bigêra binê kontrolî, gerîlayan çin bikera. No qirkerdiş o.”
Kalkanî vat ke ê rew ra nê hêrişî pawitêne û pare kerd: “Serkewtişê ma yê Garê, Zap, Metîna û Avaşînî înan ra nêşîyo. Nê hêrişî plankerde bîyî. Îqtîdarê AKP-MHPyî wazeno binkewtişê xo yê 2021î bizivirno. Coka înan nê hêrişan de pêro îmkanê xo seferberd kerdî. La nê hêrişî hêrişê peynî yê nê îqtîdarî yê. Nê hêrişan de îqtîdar yan do birijîyo yan zî îqtîdarê xo rê dewam bikero. Sey 2021î nika zî Amerîka, NATO, PDK û Tirkîya pîya hêriş kenê. Aseno ke hukmatê Iraqî zî mîyanê nê hêrişan de yo. Hetê taktîk û terzî ra dewlete de tayê vurîyayîşî estê. Mîsal dewlete nika parçe bi parçe hêriş kena. Yanî bi hêzêkê giranî hêrişê cayêkê qijî kena. PDK vano ‘Ma paştî nêdanê’ la pêşmergeyê PDKyî qereqolanê Tirkîya pawenê, hewcedarîyanê înan peyda kenê, leşkerê tirkan binê asayîşê PDKyî de derbazê herême kenê. Axir nê hêrişî do çarenusê îqtîdarê AKP-MHPyî dîyar bikerê.”
