Xebatkarê Rojnameya Azadiya Welat Kadrî Bagdû, di 14’ê cotmeha sala 2014’an de dema li Taxa Ovayê ya navçeya Seyhan a Edeneyê rojname belav dikir, di encama êrişa DAIŞ’ê de hate qetilkirin. Bagdû, di 10’emîn salvegera qetilkirina xwe de li ser gora xwe hate bibîranîn. Hevserokê Komeleya Rojnamegeran a Dîcle Firatê (DFG) Selman Çîçek, xebatkarên Çapemeniya Azad, malbata Bagdû, rêxistinên Partiya Herêmên Demokratîk (DBP), Partiya Wekhevî û Demokrasiyê ya Gelan (DEM Partî), Komeleya Mafên Mirovan (ÎHD), Komeleya Piştgirî û Piştevaniya bi Malbatên Xizmên Xwe Windakirin re ya Akdenîzê (AYKAYDER) û gelek kes tev li merasîma bîranînê bûn.
Bîranîn, bi deqeyek rêzgirtinê dest pê kir û piştre jî beşdaran rojname û gul danîn ser gora Bagdû.
Di bîranînê de ji ewil Hevserokê DFG’ê Selman Çîçek axivî û got ku tevî bi ser qetilkirina Bagdû re 10 sal derbas bûne jî hêj faîl nehatine girtin. Çîçek, bal kişand ser zextên li ser Çapemeniya Azad û got ku dê dev ji nivîsandina rastiyan bernedin.
Hevjîna Bagdû, Şemsa Bagdû jî têkoşîna xwe ya edaletê ya 10 salan vegot. Bagdû, diyar kir ku dewlet faîlan dizane lê belê dernaxîne holê û nadarizîne. Bagdû, anî ziman ku hevjînê ji ber belavkirina rojnameya bi kurdî hate qetilkirin û wiha domand: “Heke dewlet faîlan dernexîne holê, ev tê wê wateyê ku tiliya wê jî tê de heye. Ez kujeran dixwazim. Şehîd namirin.”
Hevşaredarê AYKAYDER’ê Mûstafa Yildiz jî xwest ku faîl bên darizandin. Herî dawî jî Hevserokê DEM Partiyê yê Edeneyê Seyfettîn Aydemîr axivî û got ku dê têkoşîna Bagdû bidomînin.
Piştî axaftinan, dua hatin kirin. Bagdû, bi çalakiya li Şaxa ÎHD’a Edeneyê jî hat bibîranîn.
