Di 25’ê tîrmehê de li çiyayê Sipêrêz ê navçeya Gever a Colemêrgê, operasyona leşkerî hat destpêkirin. Operasyona ku hat destpêkirin hê jî didome û bi operasyonê re zilmeke mezin li niştecihên herêma operasyonê tê kirin. Yek ji mînaka vê zilmê duh derketibû holê; leşkerên tirk duh şivanê bi navê Mûrat desteser kiribûn û bi darê zorê ew biribûn herêma operasyonê.

Di çarçoveya operasyonê de bi sedan leşker, wesayîtên zirxî û helîkopter sewqî herêma operasyonê hatine kirin. Gundên ku operasyona li wan didome dikarin wiha bên rêzkirin; Tilorana Jêr, Tilorana Jor, Pagê, Mitirban, Meşkan, Mûşan, Kendalok û Wargenima, Çiyayên Tajdîn, Sipêrêz, Xidrok, Omerê û zozanên Topizava, Gîlêşîna, Xidrok û Sêrazê.

Liv û tevgera ÎHA û SÎHA’yan heye

Hate diyarkirin ku du roj in di saetên şevê de ji qadên Çiyayê Sipêrêz û Xidirok lê ne dengê çekan tê û hate zanîn ku duh li herêma operasyonê liv û tevgera ÎHA û SÎHA’yan hebûye. Di operasyona ku berdewam dike de agahî ji şivanê bi navê Mûrat ku duh serê sibehê hatiye binçavkirin û bi darê zorê ew birine herêma operasyonê tune ye. Malbata şivan ji jiyana zarokê xwe bifikar e û banga hestiyariyê li raya giştî kir.

Li aliyê din şivanê bi navê Şiyar Demîr duh li qada çoltarê asê mabû û leşkeran nehiştibû ku gundî biçin ba wî. Hate zanîn ku Demîr ji herêma ku lê asê maye derketiye.